Álıhan Smaıylov Zańsyz aktıvterdi memleketke qaıtarý jónindegi komıssııanyń birinshi otyrysyn ótkizdi
QR Premer-Mınıstri Álıhan Smaıylovtyń tóraǵalyǵymen Zańsyz aktıvterdi memleketke qaıtarý jónindegi komıssııanyń birinshi otyrysy ótti, dep habarlaıdy Kazinform agenttigi.
Komıssııa Memleket basshysynyń tapsyrmasyna sáıkes jáne «Zańsyz aktıvterdi memleketke qaıtarý týraly» zańdy oryndaý maqsatynda qurylǵan. Onyń quramyna Úkimet músheleri, quqyq qorǵaý organdarynyń basshylary, Parlament depýtattary men qoǵam qaıratkerleri kirdi.
Komıssııanyń negizgi mindetteriniń biri – júıeli sharalardy júzege asyrý, zańsyz shyǵarylǵan kapıtaldy elge qaıtarýdyń ádisteri men tetikterin ázirleý. Bul rette barlyq sheshimder elimizdiń áleýmettik, ekonomıkalyq jáne saıası múddelerin eskere otyryp, alqaly túrde, ashyq jáne beıtarap qabyldanady.
Komıssııanyń ýákiletti organy – zańǵa sáıkes jumysyn bastaǵan QR Bas Prokýratýrasynyń Aktıvterdi qaıtarý komıteti.
Otyrys barysynda komıssııa músheleriniń nazaryna zańda kózdelgen rásimder sheńberinde aktıvterdi memleketke óz erkimen jáne májbúrli túrde qaıtarýǵa daıyndyq týraly aqparat usynyldy.
Jaqyn arada Komıssııanyń qaraýyna Komıtetpen yntymaqtastyqqa daıyn tulǵalardyń aktıvterdi óz erkimen qaıtarýy jónindegi usynystar, sondaı-aq tizilim arqyly ári qaraı zańda kózdelgen túrli talap qoıý sharalary keshenin iske asyra otyryp, ózge tulǵalarǵa qatysty májbúrli túrde qaıtarý jóninde usynystar shyǵarylatyn bolady.
Zań kúshine sáıkes aktıvterdi óz erkimen qaıtaratyn adamdarǵa naqty kepildikter beriledi. Óz erkimen qaıtarý sharttary, sondaı-aq tizilimdi qalyptastyrýdy qosa alǵanda, májbúrli túrde qaıtarý jónindegi is-qımyldar jáne t.b. Komıssııanyń qaraýyna jatady.
Sonymen qatar Komıssııaǵa zańnyń barlyq normasy kúshine engendikten, zańsyz alynǵan, onyń ishinde zańsyz shyǵarylǵan aktıvterdi memleketke óz erkimen qaıtarǵysy keletin adamdardyń QR Bas prokýratýrasynyń Aktıvterdi qaıtarý komıtetiniń atyna tıisti ótinishhat jiberýge quqyǵy bar ekeni týraly aıtyldy.
Keńesti qorytyndylaı kele, Premer-Mınıstr jumysty vedomstvoaralyq tyǵyz yntymaqtastyq negizde jáne artyq bıýrokratııasyz shuǵyl uıymdastyrýdy tapsyrdy. Qaıtarylǵan aktıvter mańyzdy áleýmettik jobalardy júzege asyrýǵa jáne jańa jumys oryndaryn qurýǵa baǵyttalatyny atap ótildi.
