Álıhan Smaıylov tehnıkalyq jáne kásiptik bilim berýdi jańǵyrtý jol kartasyn ázirleýdi tapsyrdy

Tehnıkalyq jáne kásiptik bilim berýdi jańǵyrtý jónindegi jol kartasyn ázirleýi kerek. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy Kazinform agenttiginiń tilshisi.

"Oqý-aǵartý mınıstrligi múddeli memlekettik organdarmen, ákimdiktermen jáne «Atameken» palatasymen birlesip, Tehnıkalyq jáne kásiptik bilim berýdi jańǵyrtý jónindegi jol kartasyn ázirleýi kerek. Onda kadrlarǵa degen suranystyń boljamy jáne óndiris pen ınfraqurylymnyń damýy eskerilip, salalar bólinisinde is-sharalar kórinis tabýy tıis. Qysqa merzimdi oqytýǵa memlekettik tapsyrysty bólý, ony bir tereze qaǵıdaty boıynsha ornalastyrýdyń avtomattandyrylǵan júıesin ázirleý máselelerin pysyqtaý qajet», - dedi Úkimet basshysy.

Álıhan Smaıylov Eńbek mınıstrligi, «Atameken» palatasy salalyq memlekettik organdarmen birge Ulttyq biliktilik júıesiniń tsıfrlyq platformasyn jáne kolledjderdiń bilim berý baǵdarlamalarynyń tizilimin engizýdi jedeldetýi kerektigin basa aıtty.

«Ákimdikter jetekshi kolledjderdi anyqtaý, kadrlardy daıarlaý, biliktilikti arttyrý, jáne sertıfıkattaý boıynsha salalyq klasterler qalyptastyrý máselelerin pysyqtaýy tıis. Olarda jumys berýshilerdiń salalyq qaýymdastyqtarynyń, bazalyq kásiporyndardyń, tıisti kolledjderdiń resýrstary biriktirilýi kerek. Osy maqsatta memlekettik kolledjderdi zamanaýı jabdyqtarmen qamtamasyz etý úshin «Jas maman» baǵdarlamasyn iske asyrýdy jalǵastyrý qajet», - dedi Premer-Mınıstr.