Álıhan Smaıylov Tashkentte Shavkat Mırzıeevpen kezdesti
QR Premer-Mınıstri Álıhan Smaıylov Memleket basshysynyń tapsyrmasy boıynsha Ekonomıkalyq yntymaqtastyq uıymynyń 16-shy sammıtine qatysý úshin Ózbekstanǵa keldi. Bul týraly Kazinform primeminister.kz-ke silteme jasap habarlaıdy.
Álıhan Smaıylov Tashkenttegi is-shara qarsańynda sol eldiń Prezıdenti Shavkat Mırzıeevpen kezdesti.
Premer-Mınıstr eń aldymen Memleket basshysy Qasym-Jomart Toqaevtyń jyly lebizin jetkizip, búginde eki el arasyndaǵy qarym-qatynastar senim men ózara túsinistikke negizdelgen strategııalyq seriktestiktiń jarqyn úlgisi ekenin basa aıtty. Álıhan Smaıylov atap ótkendeı, joǵary deńgeıde qol jetkizilgen barlyq ýaǵdalastyqty iske asyrý Qazaqstan men Ózbekstan úkimetteriniń baqylaýynda bolady. Mundaǵy basym baǵyttardyń biri – ekijaqty ózara is-áreketterdiń berik ári turaqty ekonomıkalyq tuǵyrnamasyn qurý.
«Ózbekstan – Qazaqstannyń eń iri saýda seriktesteriniń biri. Ortalyq Azııadaǵy barlyq óńirlik saýdanyń shamamen 70%-y bizdiń elderge tıesili. Ótken jyldyń qorytyndysy boıynsha taýar aınalymy 30%-ǵa artyp, alǵash ret $5 mlrd-qa jetti. Biz ózara saýdany $10 mlrd-qa jetkizý boıynsha belsendi jumys júrgizip jatyrmyz», — dedi Premer-Mınıstr.
Ol Qazaqstan Úkimeti ekijaqty ózara is-qımyldyń barlyq spektri boıynsha Ózbekstanmen yntymaqtastyqty serpindi damytýǵa bar kúsh-jigerin salatynyn aıtty.
Óz kezeginde Shavkat Mırzıeev eki el arasyndaǵy strategııalyq yntymaqtastyq, atap aıtqanda saýda, kólik jáne sý sharýashylyǵy salasyndaǵy ýaǵdalastyqtar júıeli túrde júzege asyrylyp jatqanyn atap ótti.
«Biz barlyq máselede alǵa jyljyp kelemiz. Menińshe, sheshilmegen másele joq. Saýda salasynda Qazaqstan Prezıdentimen kelisken jobalar bizge jańa belesterge jetýge kómektesedi», — dedi Ózbekstan Prezıdenti.
