Sheteldik áriptesterdi Qazaqstandaǵy jobalarǵa ınvestıtsııa salýǵa shaqyramyn - Álıhan Smaıylov
QR Premer-Mınıstri Álıhan Smaıylov Sheteldik ınvestorlar keńesiniń aralyq otyrysyn ótkizdi. Onda Qazaqstandaǵy ınvestıtsııalyq ahýaldy odan ári jaqsartý boıynsha sharalar men usynystar talqylandy, dep habarlaıdy Kazinform Úkimettiń baspasóz qyzmetine silteme jasap.
Premer-Mınıstr Qazaqstan Úkimetiniń aldynda 2029 jylǵa qaraı ekonomıka kólemin $450 mlrd-qa, ıaǵnı, eki esege arttyrý boıynsha aýqymdy mindet turǵanyn atap ótti.
«Biz ESG prıntsıpterin eskere otyryp, bul ýaqytta keminde $150 mlrd sheteldik ınvestıtsııa tartýdy josparlap otyrmyz. Osy maqsattarǵa jetý úshin elimizdiń ınvestıtsııalyq ahýalyn odan ári jaqsartý baǵytynda júıeli sharalar qabyldanýda», — dedi ol.
Álıhan Smaıylov atap ótkendeı, Sheteldik ınvestorlar keńesiniń kelesi plenarlyq otyrysy «Qazaqstandy jańa ındýstrııalandyrý» taqyrybyna arnalady.
«Memleket basshysy Qazaqstan halqyna Joldaýynda eldiń ónerkásiptik negizin qalyptastyrýdyń mańyzdylyǵyn atap ótti. Úkimet jumysy ınvestıtsııalar kólemin ulǵaıtýǵa, ozyq tehnologııalardy transfertteýge, óndiristerdi lokalızatsııalaýǵa jáne joǵary deńgeıde óńdelgen ónim shyǵaratyn klasterler qurýǵa baǵyttalǵan. Óńdeý sektoryn jedel damytýǵa basymdyq beriletin bolady», — dedi ol.
Onyń aıtýynsha, bul úshin qajetti zańnamalyq baza men ınstıtýtsıonaldyq orta qalyptastyryldy.
«Ónerkásiptik saıasat týraly» zań qabyldanyp, jańadan Ónerkásip jáne qurylys mınıstrligi quryldy.
«Úkimet ekonomıkanyń ósý serpinin saqtaý jáne eldegi ınvestıtsııalyq ahýaldy jaqsartý jóninde barlyq qajetti sharalardy qabyldaıdy. Biz sheteldik áriptesterimizdi Qazaqstandaǵy jobalarǵa ınvestıtsııa salýǵa shaqyramyz», — dep atap ótti Álıhan Smaıylov.
Keńes barysynda Ernst & Young, TotalEnergies, Knauf, KPMG kompanııalarynyń ókilderi jáne QR ortalyq memlekettik organdarynyń basshylary sóz sóıledi.
Talqylaý qorytyndysy boıynsha Premer-Mınıstr aıtylǵan barlyq usynystar men pikirlerdiń pysyqtalatynyn atap ótti.
Sondaı-aq is-shara aıasynda Álıhan Smaıylov Sheteldik ınvestorlar keńesin jáne jalpy respýblıkanyń ınvestıtsııalyq ahýalyn damytýǵa qosqan úlesi úshin alǵys hattar tabys etti.
Atap aıtqanda, Coca Cola Içecek Kazakhstan, Microsoft, Baker & McKenzie, Cameco Kazakhstan, Chevron Corporation, Deloitte, Exxon Mobil, Glencore, Marubeni kompanııalaryna jáne t. b. berildi.
«Osy jyldary birlesken kúsh-jigerdiń arqasynda jańa óndiris oryndary iske qosyldy, iri jobalar júzege asyryldy, eń bastysy, myńdaǵan jumys oryndary ashyldy. Yntymaqtastyǵymyz ózara tıimdi bolyp, úlken perspektıvalarǵa jol ashyp, turaqty túrde damı beretinine senimdimin. Qazaqstan Úkimeti ınvestıtsııalyq baılanystardy tereńdetip, jańa birlesken jobalardy júzege asyrýǵa daıyn», — dedi Premer-Mınıstr.
Sheteldik ınvestorlar keńesi QR Prezıdentiniń janyndaǵy konsýltatıvtik-keńesshi organ bolyp tabylady.
Keńestiń negizgi mindeti — Qazaqstannyń ınvestıtsııalyq saıasatynyń negizgi baǵyttaryn aıqyndaý, ınvestıtsııalyq ahýaldy jaqsartý jáne QR ınvestıtsııalar týraly normatıvtik quqyqtyq bazasyn jetildirý boıynsha usynymdar men usynystar ázirleý.
Qazirgi ýaqytta Keńes quramyna 33 iri transulttyq sheteldik kompanııa men halyqaralyq uıymdar basshylary, sondaı-aq sheteldik taraptan 9 baqylaýshy kiredi.
