Álıhan Smaıylov: salyq óndirýdiń tómendeýi Ulttyq qordan alynatyn transfertti kóbeıtýge májbúrledi
ASTANA. KAZINFORM – 2023 jylmen salystyrǵanda Ulttyq qor aktıvteriniń deńgeıi jalpy ishki ónimge 7%-ǵa tómendegen. Tolyǵyraq Joǵary aýdıtorlyq palatanyń tóraǵasy Álıhan Smaıylov aıtyp berdi.
— Salyq óndirýdiń tómendeýi faktory qaryz alýdyń ulǵaıýymen qatar Ulttyq qordan beriletin transfertti kóbeıtýge májbúr etti. 2024 jyly onyń kólemi 5,6 trln teńge boldy. 2023 jylmen salystyrǵanda Ulttyq qor aktıvteriniń deńgeıi jalpy ishki ónimge 7%-ǵa tómendegen. Bıýdjet tapshylyǵyn JІÓ-niń 2,6%-y dıapazonynda ustaý maqsaty oryndalmaǵan. Munaıǵa qatysty emes tapshylyqtyń belgilengen lımıti de saqtalmaǵan. Onyń absolıýtti mólsheri 10,8 trln teńge boldy, — dedi Álıhan Smaıylov Májilistiń jalpy otyrysynda.
Tóraǵa keltirgen málimetke súıensek, 2024 jyly respýblıkalyq bıýdjettiń shyǵysy boıynsha bıýdjetke 13 ret ózgeris engizildi. Al ózgeristerdiń 40%-y 4-toqsanǵa tıesili. Ótken jyly 56 mlrd teńgege 112 bıýdjettik ınvestıtsııalyq joba qarjylandyrý josparynan alynyp tastalǵan.
— Bul degenimiz gaz, sý jáne elektrmen jabdyqtaý, ınjenerlik-kommýnıkatsııalyq ınfraqurylym salasyndaǵy obektiler. Alaıda ekinshi jartyjyldyqta jalpy somasy 58 mlrd teńgege basqa 96 ınfraqurylymdyq joba engizilgen. Al jańadan engizilgen jobalardyń baǵyty sol alynyp tastalǵan jobalarǵa uqsas, — dep tolyqtyrdy aýdıtorlyq palata basshysy.
Buǵan deıin Joǵary palata tóraǵasy elimizde iri salyq tóleýshilerge monıtorıng júıesiz júrgiziletinin aıtqan edi.