Álıhan Smaıylov Qarmet boıynsha qajetti sheshimderdi bir aptada qabyldaýdy tapsyrdy
QR Premer-Mınıstri Álıhan Smaıylov jańa ınvestor men ortalyq memlekettik organdar basshylarynyń qatysýymen Qarmet kompanııasynyń qyzmeti boıynsha jumys tobynyń otyrysyn ótkizdi, dep habarlaıdy Kazinform Úkimettiń resmı saıtyna silteme jasap.
Qabyldanǵan jedel sharalardyń arqasynda kásiporynda jeltoqsan aıynda óndiris kóleminiń artqany atap ótildi. Ferroqorytpa qory men kómir qory ósti. Daıyn ónimdi jóneltý qaıta jandandy.
Kásiporyn qyzmetin turaqtandyrýǵa 28,6 mlrd teńge jeke ınvestıtsııa tartyldy. Eńbekaqy ýaqytyly berilip, salyq tólemderi, sondaı-aq MÁMS tólemderi júrgizildi.
Otyrys barysynda qatysýshylar kombınatty qajetti shıkizatpen qamtamasyz etý, daıyn ónim eksportyn qoldaý sharalaryn qamtamasyz etý, salyq salý, anyqtalǵan ekologııalyq buzýshylyqtardy joıý jáne basqa da birqatar máseleni talqylady.
2024 jyly Qarmet aldyndaǵy negizgi mindetter qatarynda – jumysshylardyń qaýipsizdigin qamtamasyz etý, óndiris kólemin ulǵaıtý, jańa ınvestıtsııalyq kelisimsharttar jasasý jáne ónimsiz shyǵyndardy azaıtý, t. b. arqyly ónimniń ózindik qunyn tómendetý máseleleri bar.
Jalpy jańa bıznes-model aıasynda aldaǵy jyldary óndiristi jańǵyrtý jáne qaıta uıymdastyrý, qaýipsizdik kórsetkishteri men ekologııalyq jaǵdaıdy túbegeıli jaqsartý (atap aıtqanda, gazǵa kóshý), shyǵarylatyn ónim nomenklatýrasyn qaıta qaraý jáne t. b. sharalar qabyldanady.
Premer-Mınıstr memlekettik organdar tarapynan kombınattyń ózekti máselelerin sheshýde qajetti qoldaý kórsetýi kerek ekenin atap ótti. Osyǵan baılanysty Álıhan Smaıylov bir apta ishinde eń basym mindetter boıynsha qajetti sheshimderdi qabyldaýdy tapsyrdy.
