Jylyna 70 myń mashına: Álıhan Smaıylov Qostanaıdaǵy kólik shyǵaratyn kásiporyndardy aralady
QOSTANAI. KAZINFORM — Qostanaı oblysyna jumys sapary barysynda QR Premer-Mınıstri Álıhan Smaıylov mashına jasaý salasynyń birqatar óndiris oryndaryn aralady.
Úkimet basshysy jylyna 70 myńǵa deıin kólik shyǵaratyn Kia avtomobıl zaýytynyń qurylysymen tanysty.
Kásiporynnyń bas dırektory Kım De Kı zaýytta 1,5 myń jańa jumys orny ashylatynyn atap ótti.
Bastapqy kezeńde Sorento, Sportage jáne Cerato sııaqty shaǵyn torapty 3 model óndirisin jolǵa qoıý josparlanyp otyr. Zaýytty iske qosý 2025 jylǵa josparlanǵan.
Álıhan Smaıylov Úkimettiń ekonomıkany ártaraptandyrýǵa jáne óńdeý ónerkásibinde lokalızatsııalaýdy tereńdetýge úlken kóńil bólip otyrǵanyn atap ótti.
«Biz koreıalyq áriptesterimizdi jáne Qazaqstanda osyndaı iri ınvestıtsııalyq jobanyń iske asyrylýyn quptaımyz. Meniń bilýimshe, bul Eýrazııa qurlyǵyndaǵy jalǵyz zaýyt. Bireýi AQSh-ta, ekinshisi osynda. Atalǵan zaýyttyń qýattylyǵyn eskersek, bul bizdiń respýblıka úshin óte mańyzdy joba», — dedi Premer-Mınıstr.
Úkimet basshysy atap ótkendeı, búginde otandyq mashına jasaý salasy, onyń ishinde avtomobıl ónerkásibi jaqsy damý qarqynyn kórsetip otyr. Ótken jyldyń qorytyndysyna sáıkes elimizde 148 myń avtokólik shyǵaryldy, bul aldyńǵy jylmen salystyrǵanda 30%-ǵa artyq.
«Biz ishki naryqty ártúrli avtokólik túrlerimen tolyqtyrý maqsatynda ǵana emes, sonymen qatar eksportqa shyǵarý úshin de osy serpindi saqtaýdy jalǵastyrýymyz kerek, bul bizdiń odan ári turaqty damýymyz turǵysynan óte mańyzdy», — dep atap ótti Álıhan Smaıylov.
Sondaı-aq Premer-Mınıstr jańa Kia zaýytynda shaǵyn torapty qurastyrý ádisimen 50 myńǵa jýyq avtokólik shyǵarylatynyn aıtty.
«Bul otandyq avtomobıl óndirisin damytýdaǵy óte mańyzdy kezeń. Biz bul jobanyń jedel júzege asýyn tolyq qoldaımyz», — dedi Úkimet basshysy.
Ári qaraı Premer-Mınıstr Allur zaýytynda Chevrolet Onix avtokóliginiń óndiristik josparymen tanysty. Allur kompanııalar toby dırektorlar keńesiniń tóraǵasy Andreı Lavrentevtiń aıtýynsha, zaýyt tolyǵymen ishki naryqqa baǵdarlanǵan jáne qoljetimdi baǵamen avtokólikter shyǵaratyn bolady. Serııalyq óndiris kólemi 30 myń birlik bolǵanda konveıer jylyna 400-den astam jańa jumys ornyn ashady.
Álıhan Smaıylov atap ótkendeı, búginde óńdeý ónerkásibiniń ekonomıkadaǵy úlesi qazirdiń ózinde óndirýshi salamen teńesti. Sonymen birge Úkimet qosylǵan quny joǵary salalardyń paıdasyna shıkizattan bas tartýdy qamtamasyz etý úshin onyń damýy qarqynyn jedeldetý boıynsha jumysty jalǵastyrady.
«Jańa óndiris oryndaryn iske qosý avtomobıl ónerkásibindegi óndiris kólemin aıtarlyqtaı arttyrýǵa múmkindik beredi. Ol qazirdiń ózinde ekonomıkamyzdyń strategııalyq mańyzdy salasyna aınalyp otyr. Biz onyń qarqyndy damýyna jáne el ekonomıkasynyń ornyqty bolýyna odan ári yqpal etetin bolamyz», — dep atap ótti Premer-Mınıstr.
Úkimet basshysy óńirde aýyl sharýashylyǵy tehnıkalaryn qurastyratyn, komponentter men qosalqy bólshekter shyǵaratyn «AgromashHoldıng KZ» lokalızatsııa ortalyǵynda boldy. Búginde kásiporyn jylyna 1 myń kombaın, 3 myń traktor, 300-ge jýyq tuqym sepkish jáne 200 jınaýshy platforma shyǵara alady. Atap aıtqanda, ótken jyly qazaqstandyq dıqandardyń egis alqabyna 1 200-den astam traktor men kombaın jetkizildi.
Álıhan Smaıylov qazirgi tańda aýyl sharýashylyǵy mashınalaryn jasaý salasy joǵary ósý qarqynyn kórsetip otyrǵanyn atap ótti.
Máselen, ótken jyl qorytyndysy boıynsha 6,4 myń astyq jınaıtyn kombaın men traktor shyǵaryldy, bul 2022 jylmen salystyrǵanda 20%-ǵa artyq.
«Biz osy qarqyndy saqtap, óndiristi arttyrýymyz qajet. Osy turǵydan alǵanda, jergilikti qamtýdy arttyrý, jumys oryndaryn ashý jáne aımaqtaǵy shaǵyn jáne orta kásiporyndardy jumyspen qamtý maqsatynda mundaı lokalızatsııalaý ortalyǵy jumysynyń mańyzy zor. Biz ákimdikpen birlese otyryp, mundaı kásiporyndarǵa jan-jaqty qoldaý kórsetetin bolamyz», — dedi Premer-Mınıstr.
Qostanaı oblysyndaǵy ónerkásip kásiporyndarynyń ósý qarqynyn eskere otyryp, el aýmaǵy boıynsha júk tasymaldaryn ulǵaıtý qajettiligi artyp keledi. Álıhan Smaıylovqa zamanaýı temirjol termınalyn salý jobasy túrinde sheshim usynyldy. Qurǵaq port aımaq arqyly konteınerlik tasymaldaý kólemin 5 esege arttyrýǵa múmkindik beredi.
