Álıhan Smaıylov qaıyrymdylyq qorlardy tekserý týraly aıtty

ASTANA. KAZINFORM – Elimizde memleket qurǵan nemese memlekettiń qatysýymen nemese memlekettiń belgili bir fýnktsııalary berilgen qorlarǵa aýdıt júrgizý usynyldy. Bul týraly QR Joǵary aýdıtorlyq palatasynyń tóraǵasy Álıhan Smaıylov aıtty.

«Joǵary aýdıtorlyq palatanyń qaıyrymdylyq qorlaryn tekserýge quzyreti joq. Joǵary aýdıtorlyq palata memleket jumsaǵan bıýdjet qarajatyn, sondaı-aq memlekettik jáne kvazımemlekettik uıymdarda bar aktıvterdi paıdalanýǵa syrtqy aýdıt júrgizedi. Sonymen qatar, Májilis qarastyryp jatqan jańa Bıýdjet kodeksi sheńberinde Joǵary aýdıtorlyq palataǵa memleket qatysýymen qurylǵan bıýdjettik emes qorlarǵa aýdıt júrgizý quzireti týraly norma engizýdi usyndyq. ıAǵnı, memleket qurǵan nemese memlekettiń qatysýymen nemese memlekettiń belgili bir fýnktsııalary berilgen qorlar. Sol kezde bizde osyndaı bıýdjettik emes qorlardy tekserý múmkindigi bolady», - dedi Á. Smaıylov Senat kýlýarynda.

«Qazaqstan halqyna» qory bıýdjettik aqshaǵa qurylǵan joq. Ázirge bizde mundaı bıýdjettik emes qorlardy tekserýge quzyret joq. «Tekserý quzyreti bolmasa da, olardyń aqshasyn ádil jumsaýyna yqpal ete alasyz ba?», - dep suraq qoıdy tilshiler.

«Meniń oıymsha, olar qoǵamdyq uıym retinde táýelsiz aýdıtorlyq kompanııalardy tartýy kerek, qaıyrymdylyq jasaıtyn adamdar bul aqshanyń qalaı paıdalanylǵany týraly aqparat berýi kerek. Sondyqtan muny qaıyrymdylyq qorlaryn uıymdastyrýshylardyń jaýapkershiligi dep sanaımyn», - dedi Á. Smaıylov.

Buǵan deıin qaıyrymdylyq qorlarynyń qurylýy men qyzmeti qalaı retteletinin habarlaǵan edik.