Álıhan Smaıylov Qashaǵandaǵy ekologııalyq daý-damaıǵa túsinik berdi

Úkimet basshysy Álıhan Smaıylov Qashaǵan ken ornynyń ınvestory jáne Qazaqstan arasyndaǵy ekologııalyq daý-damaıqa qatysty pikir bildirdi, dep habarlaıdy Kazinform. 

«Qashaǵandaǵy ekologııalyq daý, ken ornyndaǵy másele kúkirttiń kóp kólemde bolýyna baılanysty. Biz kez kelgen stsenarııge daıynbyz, biraq máseleni beıbit jolmen sheshý kerek. Bul rette ınvestıtsııalyq turǵydan klımatty áli de qoldaý kerek. NCOC kompanııasy da atalǵan máseleni beıbit jolmen sheshýge qarsy emes. Qazir biz kelissózder protsesinde turmyz. Jaqyn arada merzimder boıynsha kelisemiz dep oılaımyn», - dedi Álıhan Smaıylov Májilistiń jalpy otyrysynan keıin BAQ ókilderiniń saýalyna jaýap bere otyryp.

Premer-Mınıstrdiń aıtýynsha, endigi mindet – ken ornyndaǵy kúkirtti eksporttaý.

«Kommertsııalyq daýlarǵa keler bolsaq, joba boıynsha taraptar arasynda daýlar bolýy múmkin, bul qalypty tájirıbe. Sondyqtan jaǵdaıdy ýshyqtyrýdyń jáne saıasılandyrýdyń qajeti joq. Biz Qazaqstannyń múddesin qorǵaıtyn bolamyz», - deıdi ol.

Eske salaıyq, buǵan Qashaǵan daýyna qatysty Qazaqstan úkimeti munaı alpaýyttarymen nege sottasyp jatqany týraly habarlaǵan edik.

Qashaǵan munaı ken ornynyń operatory North Caspian Operating Company kompanııasy kúkirt saqtaýǵa qatysty tekserý boıynsha birqatar másele baryn málim etti.