Álıhan Smaıylov Qazaqstan-Qytaı jobalarynyń tizbesin keńeıtýdi usyndy
QR Premer-Mınıstri Álıhan Smaıylov Astanaǵa jumys saparymen kelgen QHR Memlekettik keńesi Premeriniń orynbasary Dın Sıýesıanmen kelissózder júrgizdi, dep habarlaıdy Kazinform Úkimettiń baspasóz qyzmetine silteme jasap.
Kezdesý barysynda taraptar saýda, ınvestıtsııa, ónerkásip, energetıka, aýyl sharýashylyǵy, kólik, logıstıka, mádenıet jáne basqa da salalardaǵy memleketaralyq yntymaqtastyqtyń keń aýqymdy máselelerin talqylady.
Álıhan Smaıylov atap ótkendeı, qazirgi ýaqytta Qazaqstan men Qytaıdyń ekijaqty taýar aınalymy joǵary kórsetkishterge qol jetkizýde. Máselen, ótken jyly atalǵan kórsetkish 35%-ǵa artyp, $24,2 mlrd-ty quraıtyn tańǵajaıyp nátıjege jetti, bıyl da qarqyndy ósý jalǵasýda.
«10 aı ishinde ózara saýda-sattyq taǵy 24%-ǵa ósti. Osyndaı qarqynmen biz jaqyn arada eki eldiń Memleket basshylary belgilegen taýar aınalymyn $40 mlrd-qa deıin ulǵaıtý jónindegi maqsatqa qol jetkize alamyz dep sanaımyn», — dedi Premer-Mınıstr.
Condaı-aq Úkimet basshysy 10 qarashadan bastap kúshine engen vızasyz rejım Qazaqstan-Qytaı qarym-qatynastarynda jańa taraý ashatynyn qosty.
«Bul shara iskerlik baılanystardy yntalandyrýǵa, saýdany jeńildetýge, ózara ınvestıtsııalardy arttyrýǵa jáne týrızmdi damytýǵa aıtarlyqtaı áser etedi. Bul, ásirese, aldaǵy «Qytaıdaǵy Qazaqstan týrızmi jyly» aıasynda ózekti», — dedi Álıhan Smaıylov.
Úkimet basshysy ındýstrıalızatsııa jáne ınvestıtsııa boıynsha birlesken Qazaqstan-Qytaı jobalarynyń tizbesin keńeıtýdiń, 2026 jylǵa deıingi Saýda-ekonomıkalyq yntymaqtastyq baǵdarlamasyn iske asyrý jónindegi Jol kartasyna qol qoıýdyń, sondaı-aq ımporttyq-eksporttyq taýarlar ózara kýálandyrý týraly kelisimdi jańartýdyń mańyzdylyǵyn atap ótti.
«Osy qujattarda qarastyrylatyn praktıkalyq sharalar jetkiziletin taýarlar nomenklatýrasyn keńeıtip, saýda seriktestigin sapaly jańa deńgeıge kóteretinine senimdimin», — dedi Premer-Mınıstr.
Budan bólek, Álıhan Smaıylov Qazaqstannyń aýyl sharýashylyǵy ónimderiniń taýar aınalymyn arttyrýǵa, Qytaıǵa eksportty arttyrýǵa jáne AÓK salasynda birlesken qaıta óńdeý jobalaryn júzege asyrýǵa múddeli ekenin atap ótti.
Sonymen qatar ol tranzıttik-kóliktik ózara is-qımyl erekshe mańyzǵa ıe ekenin atap ótti. Búginde Qytaıdan Eýropaǵa tasymaldanatyn taýarlardyń 85%-ǵa jýyǵy Qazaqstan arqyly tasymaldanady. Osyǵan baılanysty respýblıka ósip kele jatqan suranysty tolyq qamtamasyz etý maqsatynda ınfraqurylymynyń ótkizý qabiletin arttyrý boıynsha belsendi sharalar qabyldaýda.
Premer-Mınıstr kedendik protsesterdi jedeldetý máselesine erekshe nazar aýdardy. Búginde eki eldiń keden qyzmetteri shekaradaǵy avtomobıl ótkizý beketteriniń ótkizý qabileti men jumys ýaqytyn ulǵaıtý týraly kelisimge keldi. Atap aıtqanda, «Nur Joly – Qorǵas» ótkizý beketi táýlik boıy jumys isteı bastasa, qalǵan avtokólik beketteri 12 saǵattyq 7 kúndik jumys kestesine kóshti.
«Tsıfrlandyrý men protsesterdi avtomattandyrýdyń arqasynda shekaradan ótý ýaqyty qysqardy. Osy baǵyttaǵy jumystardy jalǵastyrý mańyzdy», — dedi ol.
Sondaı-aq Álıhan Smaıylov elder arasyndaǵy áýe reısteriniń sanyn odan ári arttyrýdyń jáne energetıka salasyndaǵy iri jobalardy júzege asyrýdyń mańyzdy ekenin atap ótti. Olardyń qatarynda «Qazaqstan-Qytaı» munaı qubyrynyń ótkizý qabiletin keńeıtý, Shymkenttegi munaı óńdeý zaýytyn jańǵyrtý jáne t.b. bar.
«Qazaqstan Úkimeti Qytaımen barlyq salada tolyq aýqymdy jáne ózara tıimdi yntymaqtastyqty damytýǵa daıyn», — dedi Premer-Mınıstr.
Óz kezeginde QHR Memlekettik keńesi Premeriniń orynbasary Dın Sıýesıan bıylǵy jyl Qazaqstan men Qytaı úshin óte jemisti bolǵanyn atap ótip, QHR barlyq ózara tıimdi salalardaǵy yntymaqtastyqty arttyrýǵa daıyn ekenin atap ótti.
«Qytaı men Qazaqstan jaqyn kórshi, jaqsy dos jáne seriktester. Búginde eki el de óz damýy men jandanýynyń mańyzdy kezeńinde tur. Qıly ózgerister jaǵdaıynda Qytaı men Qazaqstan úlken synaqtarǵa betpe bet keldi. Sondyqtan biz yntymaqtastyq rýhynda barlyq negizgi máseleler boıynsha ózara qoldaýdy kúsheıtýimiz kerek. Qytaı tarapy burynǵydaı Qazaqstandy jáne damý men órkendeýge baǵyttalǵan barlyq kúsh-jigerdi tabandy túrde qoldaıtyn bolady», — dedi Dın Sıýesıan.
