Álıhan Smaıylov gaz-tehnıkalyq ınspektsııalardyń sapasyz jumysyn synǵa aldy
Úkimet otyrysynda Premer-Mınıstr Álıhan Smaıylov gaz-tehnıkalyq ınspektsııalarynyń júıesiz jumysyna qatysty syn aıtty, dep habarlaıdy Kazinform agenttigi.
«Jyl basynan beri turǵyn úı sektoryndaǵy órt sany 14%-ǵa, al qaza tapqandar sany 10%-ǵa ósken. Abaı, Almaty, Jambyl jáne Ulytaý oblystarynda órt oqıǵalary ósip otyr. Sonymen qatar, gaz ballondarynyń jarylýy da jıilep ketti. Bıyl osyndaı 72 oqys jaǵdaı oryn aldy. Odan 119 adam zardap shegip, 17 adam qaza tapty. Jarylystardyń negizgi sebebi – gaz ballondaryn paıdalaný kezinde qaýipsizdik talaptaryn saqtamaý. Osyǵan baılanysty myna máselelerdi atap ótkim keledi: qazirgi ýaqytta gaz qurylǵylaryn paıdalaný kezinde qaýipsizdik talaptarynyń saqtalýyn baqylaý fýnktsııasy ákimdikterge júktelgen. Óńirlerde gaz-tehnıkalyq ınspektsııalar qurylǵan. Alaıda, olar áli kúnge deıin jumysty tıisti deńgeıde uıymdastyra almaı otyr», - dep vedomstvonyń jumysyn synǵa aldy Álıhan Smaıylov.
Premer-Mınıstrdiń sózinshe, ınspektsııalarda bilikti mamandar men qajetti jabdyqtar jetispeıdi.
«Osyǵan baılanysty óńir ákimdikteri gaz-tehnıkalyq ınspektsııalardyń ókilettikterin keńeıtý jáne olardy qamtamasyz etý boıynsha jumys júrgizýi qajet. Tótenshe jaǵdaılar mınıstrligi Azamattyq qorǵaý akademııasynyń bazasynda osy salaǵa arnalǵan kadrlardy daıarlaý deńgeıin arttyrý jóninde sharalar qabyldaýy kerek. Sondaı-aq, jaramsyz gaz ballondaryn alyp qoıý jáne ýtılızatsııalaý tártibi rettelmegen. Olardy ózimizde óndirý máselesi de áli kúnge deıin sheshimin tappaı otyr. Osyǵan baılanysty, Ónerkásip jáne Energetıka mınıstrlikteri atalǵan problemalardy sheshý boıynsha tıisti sharalar qabyldaýy qajet», - dep tapsyrma júktedi Úkimet basshysy.
Buǵan qosa Álıhan Smaıylov gaz toltyrý oryndarynda ballondardyń sapasyn baqylaý, jaramdylyq merzimin tekserý boıynsha túsindirý jumysyn júrgizýdi tapsyrdy.
«Júrgizilgen taldaý nátıjesi órt oqıǵalarynyń kóbine jeke turǵyn úıler men qora-jaılarda bolatynyn kórsetip otyr. Onda negizinen egde jastaǵy adamdar men balalar qaza tabady. Abaı, Shyǵys Qazaqstan jáne Ulytaý oblystarynyń ákimdikteri úılerde gaz datchıkterin ornatý jumystaryn tıisti deńgeıde júrgizbeı otyr. Osyǵan baılanysty Tótenshe jaǵdaılar mınıstrligi óńir ákimdikterimen birge úılerdi esepke alý, birinshi kezekte halyqtyń áleýmettik osal toptarynyń úılerin esepke alyp, arnaıy datchıkter ornatýy qajet», - dedi Premer-Mınıstr.
Qosa ketsek, jyl basynan beri turǵyn úı sektorynda bolǵan órtterden 203 adam qaza tapqan.
Buǵan deıin habarlaǵanymyzdaı, Aqtóbe qalasy Bereke turǵyn alaby, Batys-2 shaǵyn aýdany mańynda gaz taratý stansasynan aqaý shyǵyp, eki shaǵyn aýdandy ıis jaılap ketti.
