Álıhan Smaıylov Eýropa ınvestorlaryn birlesken jobalarǵa keńinen qatysýǵa shaqyrdy
QR Premer-Mınıstri Álıhan Smaıylov pen Eýropalyq komıssııanyń vıtse-prezıdenti Margarıtıs Shınas Qazaqstan men Eýropalyq odaqtyń saýda-ekonomıkalyq qatynastaryn nyǵaıtý jónindegi aldaǵy qadamdardy talqylady, dep habarlady primeminister.kz.
Astanada ótken kezdesý aıasynda taraptar taýar aınalymyn ulǵaıtý, ınvestıtsııalar tartý, kólik-logıstıka salasyndaǵy yntymaqtastyqty nyǵaıtý, vızalyq rejımdi jeńildetý, ónerkásip kooperatsııasyn ulǵaıtý jáne basqa da birqatar máseleni qarastyrdy.
Úkimet basshysy Qazaqstan Eýropalyq odaqpen ózara tıimdi qarym-qatynastardy nyǵaıtýǵa erekshe mán beretinin atap ótti.
Bul rette keńeıtilgen áriptestik pen yntymaqtastyq týraly kelisim, sondaı-aq EO-nyń Ortalyq Azııa boıynsha jańa strategııasy mańyzdy ról atqarady.
«Biz ózara senim men qurmetke negizdelgen Qazaqstan-Eýropa yntymaqtastyǵyn odan ári kezeń-kezeńmen damytýdy qoldaımyz», — dedi Álıhan Smaıylov.
Premer-Mınıstr atap ótkendeı, EO — Qazaqstannyń iri saýda jáne ınvestıtsııalyq seriktesteriniń biri. EO úlesine syrtqy saýdanyń shamamen 30%-y jáne tartylǵan ınvestıtsııalardyń shamamen 40%-y tıesili.
Máselen, ótken jyldyń 11 aıynda taýar aınalymy 5%-ǵa jýyq ósip, shamamen $38 mlrd-qa jetti. 2022 jyly EO-dan Qazaqstanǵa salynǵan ınvestıtsııalar kólemi $12,5 mlrd-ty qurap, sońǵy 10 jyldaǵy eń joǵary deńgeıdi kórsetti.
«Búginde Qazaqstanda 6 myńǵa jýyq birlesken kásiporyn jumys isteıdi, onyń 130-y ótken jyly ǵana qosyldy. Bul kórsetkishter eýropalyq seriktesterge ekonomıkamyzdyń turaqtylyǵy men tartymdylyǵyn kórsetedi. Eýropanyń ınvestıtsııalyq qoǵamdastyǵyn birlesken jobalarǵa keńinen qatysýǵa shaqyramyz», — dedi Álıhan Smaıylov.
Sonymen qatar Úkimet basshysy ózara is-qımyldyń mańyzdy baǵyty tranzıttik kólik salasy ekenin aıtty. Búginde Qytaıdan Eýropaǵa jiberiletin taýarlardyń shamamen 85%-y Qazaqstan arqyly tasymaldanady.
Atap aıtqanda, ótken jyly Transkaspıı halyqaralyq kólik baǵyty aıasynda júkterdi aýystyryp-tıeý kólemi 65%-ǵa ósti. Orta merzimdi perspektıvada mundaǵy júk aǵynyn 10 mln tonnaǵa deıin jetkizý josparlanyp otyr.
«Osy maqsatqa jetý úshin Ázerbaıjanmen, Grýzııamen jáne Túrkııamen atalǵan baǵyttyń „tar jerlerin“ joıý boıynsha jol kartalarǵa qol qoıyldy. Sondaı-aq Qazaqstanda temirjol, port ınfraqurylymyn jańǵyrtý, jyljymaly quram men saýda flotyn ulǵaıtý boıynsha birqatar iri ınfraqurylymdyq jobalar iske asyrylýda. Biz sondaı-aq júk jóneltýshige naqty ýaqyt rejıminde óz júkteriniń qaıda ekenin kórsetýge múmkindik beretin aqparat júıelerin bir retke keltirip jatyrmyz», — dedi Úkimet basshysy.
Óz tarapynan Eýropalyq komıssııanyń vıtse-prezıdenti Qazaqstannyń Eýropalyq odaq úshin mańyzdy áriptes ekenin atap ótti.
«Qazaqstanda aýqymdy jańǵyrtý protsesteri júrip jatqanyn bilemiz. Eýropalyq odaq atynan Qazaqstandy Ortalyq Azııa óńirindegi mańyzdy oıynshy etip otyrǵan Prezıdent Qasym-Jomart Toqaevtyń bastamasymen iske asyp jatqan reformalardyń mańyzyn atap ótkim keledi», — dedi Margarıtıs Shınas.
Ol sondaı-aq Global Gateway bastamasy aıasynda ótetin Eýropa men Ortalyq Azııa arasyndaǵy kólik qatynastaryn turaqty damytý jónindegi aldaǵy Investorlar forýmynyń mańyzyn atap ótti. Onyń jumysyna Qazaqstan da qatysady.
