Álıhan Smaıylov ekonomıka ósimin qamtamasyz etý josparyn aıtty
Búgin Májilistiń jalpy otyrysynda Ulttyq qordan qarajat alýdy toqtatý týraly usynys aıtyldy, dep habarlaıdy Kazinform.
«Ulttyq qor bolashaq urpaqqa arnalǵan. Prezıdent Ulttyq qordyń valıýtalyq aktıvterin 2030 jylǵa qaraı 100 mlrd AQSh dollaryna deıin jetkizý mindetin qoıyp otyr. Alaıda 2021 jyldyń basynda qordaǵy qarajat 67 mlrd dollar bolsa, qazir 60 mlrd dollarǵa deıin túsken. 2024 jyldyń birinshi qańtarynan bastap Memleket basshysynyń tapsyrmasyna sáıkes Ulttyq qordyń ınsvestıtsııalyq tabysynan balalarǵa qarajat aýdaryla bastaıdy, ıaǵnı bul baǵytta Parlament tıisti zańdy qabyldady. Osy oraıda halyqtyń Ulttyq qorǵa degen nazary erekshe bolady, óıtkeni ár ata-ana balalaryna qordan qansha aqsha túskenin kútip otyrady. Sondyqtan bolashaqta osy qordan qarajat alýdy toqtatýymyz kerek», - dedi Májilis depýtaty Nurtaı Sabılıanov.
Óz kezeginde Úkimet basshysy Álıhan Smaıylov 2024 jyly Ulttyq qordan tartylatyn nysanaly transferttiń kólemi 1,6 trln teńgeni quraıtynyn aıtty.
«Olar áleýmettik mańyzy bar jáne strategııalyq ınfraqurylymdaǵy jobalardy qarjylandyrýǵa baǵyttalǵan. Sonymen qatar, Ulttyq qordan tartylatyn qarajat, nysanaly transfertter jyl saıyn azaıady. Onyń ornyn respýblıkalyq kirister toltyrady. Ol úshin tıisti ınvestıtsııalardy tartyp, naqty sektordy qarjylandyrý máselelerin sheshemiz. Bul qadamdar memlekettik qoldaý is-sharalary arqyly, ıaǵnı shaǵyn jáne orta bıznesti qoldaý, agroónerkásip keshenin qarjylandyrý aıasynda iske asyrylady. Qazir 32 trln teńgeni quraıtyn 970 iri ınvestıtsııalyq jobany júzege asyryp jatyrmyz», - dedi Premer-Mınıstr.
Onyń sózine qaraǵanda, barlyq jobany iske qosý úshin ınfraqurylymdy jańǵyrtý kerek.
«Sol úshin «tarıfti ınvestıtsııaǵa aıyrbastaý» baǵdarlamasyn júzege asyryp jatyrmyz. Tarıfterdiń esebinen sýmen, jylýmen, gazben, elektr qýatymen jabdyqtaý jelilerine 3 trln teńgeden astam qarajat tartylady. Bul ınfraqurylymdy jańǵyrtý – naqty sektor salalaryna tikeleı oń áserin beredi. Jalpy, keler jyldary ekonomıkalyq ósim qarqyny joǵarylaıdy. Bıyl 4,7 paıyz bolsa, keler jyly 5,3 paıyz shamasynda bolady. 2026 jylǵa deıin 6 paıyzǵa deıin ósedi dep eskerip otyrmyz. Ol úshin respýblıkalyq bıýdjet kiristerin kóbeıtý boıynsha ekonomıkany nyǵaıtýymyz kerek. Ekinshiden, kedendik ári salyq salasyndaǵy ákimshilendirýdi jaqsartý mańyzdy. Jalpy, «kóleńkeli» ekonomıkany azaıtýǵa erekshe ekpin qoıylyp otyr», - dedi Álıhan Smaıylov.
