Álıhan Smaıylov EAEO elderin tranzıttik jáne kóliktik ınfraqurylymdy birlesip damytýǵa shaqyrdy
ALMATY. KAZINFORM – Premer-Mınıstr Álıhan Smaıylov Eýrazııalyq úkimetaralyq keńestiń otyrysynda Eýrazııalyq ekonomıkalyq komıssııa EAEO elderimen birlesip naqty ekonomıkalyq jobalardy júzege asyrý úshin bar kúsh-jigerin salýy kerek ekenin aıtty.
Úkimeti basshysynyń aıtýynsha, elder arasyndaǵy ózara is-qımyldyń negizgi baǵyttarynyń biri - tranzıttik jáne kóliktik ınfraqurylymdy damytý.
«EAEO Shyǵys pen Batystyń, Soltústik pen Ońtústiktiń toǵysqan jerinde ornalasqan, bul árqashan bizdiń óńirdiń básekelestik artyqshylyǵy bolyp tabylady. Qazaqstan tranzıttik jáne kóliktik ınfraqurylymdy damytýǵa erekshe mán beredi. Sońǵy 15 jylda elimiz osy maqsattarǵa 35 mıllıard dollardan astam qarjy bóldi», - dedi Premer-Mınıstr.
Álıhan Smaıylovtyń sózinshe, Lıanıýngandaǵy logıstıkalyq ortalyq, «Qorǵas» qurǵaq porty, Batys Eýropa – Batys Qytaı tranzıttik tas joly, Qytaıdan Iranǵa temirjol dálizi, «Quryq» jáne «Aqtaý» teńiz porttaryn jańǵyrtý sııaqty iri ınfraqurylymdyq jobalar iske qosyldy. Sondaı-aq «Baqty – Aıagóz», «Darbaza – Maqtaaral» baǵytyndaǵy jańa temirjol jelileriniń qurylysy bastalyp, Dostyq-Moıynty ýchaskesinde ekinshi jol tóselýde.
Sonymen qatar, Qytaıdyń Sıan qurǵaq portynda qazaqstandyq termınaldyń qurylysy bastaldy. Reseı, Túrikmenstan, Úndistan jáne Iran taraptarymen birlesip, Soltústik-Ońtústik dáliziniń shyǵys baǵytyn sınhrondy damytý boıynsha jumystar júrgizýde.
«Biz elderimizdiń halyqaralyq dálizderiniń, logıstıkalyq termınaldary men pýnktteriniń ótkizý qabiletin odan ári arttyrý mańyzdy dep sanaımyz. Men EAEO-nyń barlyq elderin tranzıttik-kóliktik ınfraqurylymdy damytý boıynsha birlesken jobalardy júzege asyrýǵa shaqyramyn», – dedi Álıhan Smaıylov.
