Álıhan Smaıylov bıýdjet ákimshilerine qatań suraý bolatynyn eskertti

ASTANA. KAZINFORM – Joǵary aýdıtorlyq palata tóraǵasy Álıhan Smaıylov Májilistiń jalpy otyrysynda bıýdjet ákimshilerin óz mindetterine nemquraıly qaramaýǵa shaqyrdy.

«Bıýdjettiń árbir teńgesi qarajat tapshylyǵy jaǵdaıynda qarastyrylǵanyn eske salǵym keledi. Sol kezeńde men Premer-Mınıstr bolǵandyqtan, bul máseleni óte jaqsy bilemin. Balamaly qarjylandyrý kózderi boıynsha aýqymdy jumystar júrgizildi. Bul basym mindetterdi resýrstarmen tolyq qamtamasyz etý úshin jasalǵan bolatyn. Bıýrokratııalyq kedergiler alynyp, ulttyq jobalardy ýaqytyly iske qosý úshin barlyq jaǵdaı jasaldy. Sondyqtan Joǵary aýdıtorlyq palatanyń basshysy retinde óz mindetterine nemquraıly qaraǵan bıýdjettik ákimshilerden suraý qatań jáne ádil bolady dep sendirgim keledi», - dedi Á.Smaıylov.

Sondaı-aq, ol óńdeýshi ónerkásip jobalaryn aýdıtin júrgizý bastalǵanyn aıtty. 

«Onyń nátıjelerin bıyl baıandaımyz. Kvazımemlekettik sektor sýbektileri jalpyhalyqtyq mindetterdi iske asyrýǵa qatysyp otyr. 2023 jyldyń ózinde respýblıkalyq bıýdjetten 1,2 trln teńgege jýyq qarjy alǵan. Bul rette kvazımemlekettik sektor sýbektileri paıdalanbaǵan qarajat jyl qorytyndysy boıynsha ótken kezeńmen salystyrǵanda 2,5 eseden astam ósip otyr. Basqa da kóptegen mańyzdy mindetterdi sheshýge bıýdjet qarajatynyń jetpeı jatqanyn eskersek, bul – óreskel jaǵdaı. Resýrstardy ekonomıkaǵa jáne qazaqstandyqtardyń ıgiligi úshin paıdalaný kerek», - dedi Joǵary aýdıtorlyq palata tóraǵasy.

Eske salsaq, Álıhan Smaıylov bıylǵy 5 aqpanǵa deıin Úkimetke jetekshilik etken edi.