Álıhan Smaıylov avtomobılmen halyqaralyq júk tasymaldaýshylardyń shaǵymdary týraly aıtty

Búgin Úkimet otyrysynda Premer-Mınıstr Álıhan Smaıylov avtomobılmen halyqaralyq júk tasymaldaýdaǵy kedergilerdi atady, dep habarlaıdy Kazinform.

«Avtomobıl kóligimen júk tasymaldaý salasynyń damýy ekonomıkanyń barlyq sektorlaryna oń áserin tıgizedi. Qazirgi tańda Qazaqstan arqyly 8 halyqaralyq avtomobıl dálizi ótedi. Olardyń jalpy uzyndyǵy shamamen 13 myń shaqyrymdy quraıdy. Negizgi kúre joldardyń qatarynda Batys Eýropa – Batys Qytaı, Soltústik – Ońtústik, TRASEKA jáne basqalaryn aıtýǵa bolady. Sondyqtan, atalǵan baǵyttar boıynsha júk tasymalyn ulǵaıtý jáne júkterdiń jyldam ótýin qamtamasyz etý úshin bul saladaǵy kedergilerdi barynsha qysqartý qajet», - dedi Úkimet basshysy.

Premer-Mınıstr mundaı kedergilerdiń qatarynda shekaradaǵy keptelister men qujattardyń uzaq rásimdelýin, ınfraqurylym sapasyn, uıymdastyrý jumystarynyń nasharlyǵyn jáne kóptegen basqa da jaıttardy jatqyzýǵa bolatyndyǵyn aıtty.

«Kólik ıelerinen kelip túsetin shaǵymdar kóbine osy máselelerge qatysty. Sonymen qatar, júkter men qujattardyń tym uzaq tekserilýi de narazylyq týǵyzady. Tsıfrlyq tehnologııalar men aqparattyq júıelerdiń ıntegratsııasy arqyly bul máselelerdi osy ýaqytqa deıin bir júıege keltirýge bolatyn edi. Onyń ústine, júkterdi bólip-taratýdyń asa mańyzdy ınfraqurylymdyq býyny bolyp tabylatyn bond qoımalaryn damytý qajet. Mundaı álemdik tájirıbe bizdegi ótkizý pýnktterdiń júktemesin azaıtyp, tasymal kólemin ulǵaıtýǵa múmkindik beredi», - dedi Álıhan Smaıylov.