«ArselorMıttal Temirtaýdy» memleketke qaıtarý sharty qashan jarııalanady

«ArselorMıttal Temirtaý» kompanııasyn memleketke ótkizý sharttary qarasha aıynyń sońynda jarııalanady. Bul týraly Májilistiń jalpy otyrysynan keıingi baspasóz máslıhatynda Premer-Mınıstr Álıhan Smaıylov aıtty, dep habarlaıdy Kazinform. 

Búgin Májilistiń jalpy otyrysynan keıin tilshiler Úkimet basshysynan «ArselorMıttal Temirtaý» kompanııasyn memleketke qaıtarý aıasynda qandaı sharttar qoıylǵanyn surady.

«Byltyrdyń jeltoqsan aıynan «ArselorMıttal Temirtaý» kompanııasyn ıelerimen kúrdeli kelissózderdi bastadyq. Birinshiden, biz ishki ınvestıtsııalyq ahýaldy nasharlatpaı, saqtaýymyz kerek. Elimizde myńdaǵan sheteldik ınvestor bar. Sonymen qatar qosymsha aýqymdy ınvestıtsııalardy tartý maqsatymyz bar», - dedi Á.Smaıylov.

Munymen qosa ol bul máselede halyqaralyq sottarda qaralatyn daý-damaıǵa jetkizbeý kerek ekenin aıtty.

«Ekinshiden, «ArselorMıttal Temirtaý» iri kompanııa ekenin umytpaý kerek. Ol jerde 30 myńnan astam adam jumys istep jatyr. Sondyqtan bul iri kompanııanyń turaqty jumysy qamtamasyz etilýi tıis. Bul turǵyda joǵaryda atalǵan kelissózder biraz ýaqyt aldy. 22 qazan kúni aldyn ala tıisti shartqa qol qoıdyq. Osy «ArselorMıttal Temirtaý» kompanııasyn Qazaqstan Respýblıkasynyń menshigine ótkizý sharttaryn kelistik. Ázirge bul shartty jarııa ete almaımyz. Sebebi zańdy rásimderdi tolyqtaı aıaqtaýymyz kerek. Aldyn ala jasalǵan kelisim boıynsha biz 30 qarashaǵa deıin, ıaǵnı bir aıdyń ishinde barlyq rásimderdi aıaqtaýymyz qajet. Sodan keıin barsha aqparatty jarııalaımyz», - dedi Premer-Mınıstr.

Budan buryn habarlanǵandaı, «ArselorMıttal Temirtaý» AQ memleket menshigine qaıtarylady.