Álıhan Smaıylov áleýmettik-kásipkerlik korporatsııalaryn synǵa aldy

ASTANA. KAZINFORM — Іs júzinde áleýmettik-kásipkerlik korporatsııalar basqa fýnktsııalarmen aınalysyp keledi. Bul týraly kásipkerlik sýbektilerin memlekettik qoldaýdyń tıimdiligine júrgiziletin aýdıt boıynsha esepti jarııalaý kezinde Joǵary aýdıtorlyq palatanyń tóraǵasy Álıhan Smaıylov aıtty. 

— Áleýmettik-kásipkerlik korporatsııalarǵa toqtalsaq, olar óńirlik damý ınstıtýttary retinde qurylǵan. Korporatsııalar memleket pen bıznes arasyndaǵy baılanystyrýshy býyn, óńirlik deńgeıde prıorıtetti jobalardy iske asyrý quraly bolady dep boljandy. Alaıda is júzinde áleýmettik-kásipkerlik korporatsııalar basqa fýnktsııalarmen aınalysyp keledi. Buǵan ortalyq memlekettik organ tarapynan júıeli úılestirý men strategııalyq basqarýdyń bolmaýy sebep boldy, — dedi Álıhan Smaıylov Májilistiń jalpy otyrysynda.

Osy oraıda ol búginde korporatsııalarda naqty maqsat, qyzmettiń biryńǵaı baǵdarlary jáne damýdyń túsinikti modeli aıqyndalmaǵanyn atap ótti.

— Korporatsııalar kásipkerlerdi negizinen jeńildikpen kredıt berý arqyly qoldap jatyr. Aýdıtorlarda osyǵan qatysty suraq bar. Áleýmettik-kásipkerlik korporatsııalar qarjy uıymdary emes. Qyzmettiń bul túri olardyń jarǵysynda kózdelmegen jáne qoldanystaǵy zańnamada reglamenttelmegen. Іs júzinde korporatsııalardy ýákiletti retteýshi organ qadaǵalamaıdy. Bundaı tásil básekelestik ortany shektep qana qoımaı, turaqty ekonomıkalyq baılanystardy qalyptastyrmaıdy. Memlekettik aktıvterdiń ájeptáýir berilýine jáne turaqty qarjylyq qoldaýǵa qaramastan, áleýmettik-kásipkerlik korporatsııalardyń kópshiligi qyzmetin shyǵynmen júzege asyryp jatyr, — dedi JAP basshysy.

Buǵan deıin habarlanǵandaı, Joǵary aýdıtorlyq palata bıznesti qoldaý tetikteriniń kemshiligin atady.