Álıhan Smaılov: Halyq turmysyn jaqsartý Úkimettiń basty mindeti
«Asa qurmettti Prezıdent myrza, qurmetti depýtattar! Maǵan úlken senim artqandaryńyz úshin alǵysymdy aıtamyn. Bul men úshin zor jaýapkershilik. Qazirgi kezde Memleket basshysynyń jetekshiligimen eldiń egemendigi men ulttyq qaýipsizdikti, beıbitshilik pen kelisimdi nyǵaıtýǵa, halyq únine qulaq asatyn memleketke baǵyttalǵan ózgerister júzege asyp jatyr. Azamattardyń zańdy talaptary eskerilip, iske asatyn bolady. Qasym- Jomart Kemeluly eldegi áleýmettik-ekonomıkalyq jaǵdaıdy turaqtandyrý, halyqtyń turmysyn jaqsartý týraly tapsyrmalaryńyz Úkimet úshin basym mindet bolady», - dedi Álıhan Smaılov Májilis otyrysynda.
Onyń aıtýynsha, el Úkimetin aýqymdy jumys kútip tur.
«Úkimet Prezıdenttiń joldaýlaryn, bastap jatqan reformalaryn jáne tapsyrmalaryn, strategııalyq jáne baǵdarlamalyq qujattardy iske asyrý jumystaryn júrgizetin bolady. Tıimdi makroekonomıkalyq saıasatty júzege asyrý jahandyq ózgeristerdiń áserine ushyraǵan ınflıatsııany birtindep tómendetý jáne makroekonomıkalyq turaqtylyqty qamtamasyz etý mańyzdy mindetteri tur. Bıznes klımatty jaqsartý, halyqty jumyspen qamtý men jalaqyny kóterý jónindegi keshendi sharalar azamattardyń naqty tabysynyń ósýine yqpal etedi. Úkimet jumysynyń basty maqsaty – halyqtyń ál-aýqatyn arttyrý. Sondyqtan memlekettik bıýdjet tıisti sharalarǵa kózdeletin bolady. Aldymyzda áli koronavırýsty meńgerý mindeti tur. Úkimettiń aldyna qoıylatyn mindetterdi sheshý úshin barlyq kerekti sharalar qabyldanatyn bolady», - deıdi ol.
Aıta keteıik, Memleket basshysynyń qatysýymen ótip jatqan Májilis otyrysynda QR Premer-Mınıstri laýazymyna Álıhan Smaıylov taǵaıyndaldy.
