Álıhan Bókeıhanovtyń emennen oıylyp jasalǵan ettabaǵy tabyldy
«Aqtoǵaıdan qońyraý shaldy. Ánısha Jasymbekqyzy eken. Álıhan babamyzdyń urpaǵy. Bókeıdiń toǵyz ulynyń biri Batyrdan Myrzataı men Rústem týady. Myrzataıdan Nurmuhamed balalary Álıhan, Smahan týsa, Rústemnen Begetaı balasy Jasymbek týady.
Keńestik ókimettiń kómýsiz qalǵan Álıhanǵa joqtaý sózdi de qımaǵany belgili. Smahan tóre Taldybeıitke tas qoıǵanda Álıhanǵa arnalǵan qulpytastaǵy jazýdy naq osy Jasymbektiń qolymen óshirtedi. Ne degen surqaı saıasat edi?! Álekeńniń bir baýyry janyn jaldap júrip qulpytas qoıady, taǵy bir baýyry sondaǵy esti sózdi qoly dirildep otyryp óshiredi...
Bul kezde Jasymbek aǵa Jińishke boıyndaǵy birinshi bólimshede turypty. Qulpytasty al dep buıyrǵan ǵoı qyzyl kommýnıster. Ári oılap, beri oılap Jasymbek aǵa bir amalyn tapqan. Atarbamen baryp, qulpytastaǵy jazýdy sylap tastaǵan. Qyzyl kommýnıster qalaı dese de qulpytasty almaıdy.
Bir jaqsy kúnniń keletinine sengen ǵoı. Ókinishtisi, ol kisi sol jaqsy kúnge jete almady. 1980 jyly baqılyq bolypty.
Sol sylaq 1992 jyly Aqtoǵaıda úsh arystyń toıy toılanǵanda alynǵan ǵoı. Sondaǵy baqytty jandardyń biri osy Ánısha apaıymyz bolypty. Bul áýlet te qýǵyn-súrgindi kórip baǵady. Alaıda bul atanyń urpaǵy azattyq rýhyn arqalap erteńine jóńkigen uly kóshten qalmaıdy.
Ánısha apaıymyz - sol tekti urpaqtyń juqanasy. Qyryq jylǵa tarta mektepte ustaz bolǵan. Aldynan myńdaǵan shákirt órbitken. Álıhan babamyzǵa qatysty aqtańdaqtarǵa bir sáýle túsirýge umtylǵan jandardyń biri. Ondaı jazbalary qazaq baspasózinde jarııalanyp júr.
- Álıhan atamnan bir jádiger qalyp edi...
Men tilimdi tisteıin.
- Álıhan atamyzdan qalǵan qundy jádiger - emennen oıylyp jasalǵan kádimgi ettabaq. Bul tabaqty babamyz meniń ájem Saqypqa ákep bergen. Ǵasyrdan asa saqtalǵan qundy jádigerdi Qalymhan sheshem búgingi kúnge deıin saqtap keldi.
Apaıdyń jaqsy habaryna janym semirip qala berdim. Taǵy da habarlasatynyn aıtty. Jaqsy habarmen», - dep jazady basylym.
