Álıhan Baımenov: Tildiń ıesi — Termınkom emes, ult

ASTANA. KAZINFORM — Tildiń ıesi — Termınkom emes, tildiń ıesi — ult. Bul týraly Kazinform agenttiginiń BIZDIÑ ORTA podkastynda Memlekettik qyzmet haby basqarýshy komıtetiniń tóraǵasy Álıhan Baımenov aıtty.

— Tildiń ıesi ult ekenin umytpaýymyz kerek. Tildiń ıesi — Termınkom emes, tildiń ıesi — ult. Ýaqyt ótken saıyn emle erejesi de qarapaıymdalyp jáne jetildirilip otyrýy kerek. Sonymen qatar sózdik qor da tolyqtyrylyp otyrýy qajet… Aǵylshynnyń tildik qory HH ǵasyrdyń basynda 500 myń bolsa, HHІ ǵasyrda 1 mıllıonǵa jetkenin oqydym. Bizdiń ómir saltymyz, qorshaǵan ortamyz, sharýashylyǵymyzdyń negizi sózdik qorǵa áser etedi. Eger biz myń jyl buryn jazylǵan Mahmud Qashqarıdiń sózdigin alsańyz, odan keıin biz aıyrylǵan kóptegen sózdi bilesiz, — dedi komıtet tóraǵasy.

Ol Qashqarıdyń Asqar Egeýbaev qazaqılandyrǵan sol nusqasyn qazir qaıta basyp shyǵarý kerektigin aıtady.

— Kezinde sol kitaptan myń jyl buryn bizde «parıktiń» qazaqsha balamasy bolǵanyn kórip qaldym. Keıin qaıta izdep taba almadym. Sebebi álippemen jazylmaǵan. Basqa qaǵıdatpen sózder bólek-bólek, keıde sóz tirkesteri túrinde jazylǵan. Biz osyndaı burynǵy qazynamyzdan da aıyrylmaýymyz, iske qosyp, paıdalana bilýimiz qajet, — dedi Álıhan Baımenov.

Buǵan deıin zańger Serik Aqylbaı jańa Konstıtýtsııa jobasy qazaq tilinde jatyq jazylǵanyn atap ótti.