Álıhan Baımenov: Kósheler men eldi mekenderge adamdardyń atyn berýge moratorıı jarııalaý kerek
ASTANA. KAZINFORM — Onomastıka salasynda moratorıı jarııalaýdy qajet etetin máseleler bar. Bul týraly Kazinform agenttiginiń BIZDIÑ ORTA podkastynda Memlekettik qyzmet haby basqarýshy komıtetiniń tóraǵasy Álıhan Baımenov aıtty.
— 80-jyldarmen salystyrǵanda Táýelsizdiktiń arqasynda qazaq tiliniń qoldaný aıasy keńeıip, psıhologııalyq turǵyda ózimizdi erkin sezinemiz. Táýelsiz memlekettiń memleket quraýshy ulty ekenimizdi túsinemiz. Soǵan sáıkes, tilimiz de damyp keledi. Termınkom oqtyn-oqtyn jumysyn baıandap qoıady. Ótkende 140 myń termın bekitti degen aqparat oqyǵanymda tań qaldym. Keıin túsindim, «mıkrofondy» mıkrofon dep jazsa, bireý dep eseptegen sııaqty. Áıtpese, 140 myń kóp qoı. Mundaı halyqaralyq tájirıbede bar, bir termındi sol qalpynda paıdalanady, — dedi Álıhan Baımenov.
Onyń paıymdaýynsha, bir zatqa, qubylysqa jańa ataý berý — ult tiliniń tirliginiń negizi.
— Sondyqtan da kóshelerge, eldi mekenderge adamdardyń atyn berýge moratorıı jarııalaý kerektigin aıtyp júrmin. Bireýdiń atymen qoıylǵan kósheden góri, Ór kóshe, Yldı kóshe, Kóleńkeli kóshe, Shýaqty kóshe, Shıeli kóshe, Arshaly kóshe degen ultymyzdyń bergen ataýy bolar edi. Sıpattaý bolar edi. Qazir sol sıpattaý qabiletimizden aıyrylyp qala jazdap otyrmyz, — dedi komıtet tóraǵasy.
Buǵan deıin Báımenov memlekettik grantty máseleni sheshýge ne qoǵamdyq uıymdy qol balaǵa aınaldyrýǵa jumsaýǵa bolatynyn aıtty.
