Álıhan Baımenov: Qaǵaz toltyrý, esep berý sııaqty jumystar áli de muǵalimniń kóp ýaqytyn alady
Onyń aıtýynsha, bilim júıesindegi ustaz ben shákirt adamzat órkenıetiniń damýynda óte mańyzdy ról atqarady.
«Búgingi kúnniń ustazy jańa tehnologııalar zamanynda órkenıettik mıssııasyn atqarýy úshin oǵan degen senim bolýy kerek. Onyń abyroıyn kóteretin qadamdar jasalýy tıis. Bizdiń bilim berý júıesindegi ýnıversıtetter men mektepter ózin-ózi basqarý júıesine kóshkeni jón. Sonda talapqa saı jańa baǵdarlamalar júzege asyrylady. Bilim mınıstrligi óz mıssııasyn oqý oryndary men halyqtyń bilimge degen qajettiligin óteý dep belgileýi kerek. Bizdiń bilim berý júıesi osy baǵytta damysa, onda jańa tehnologııalardy da durys paıdalanamyz. Sebebi jańa tehnologııalar – qural»,-deıdi Álıhan Baımenov.
Al, túpki maqsat – bilikti, tárbıeli, adamzattyń ortaq qundylyqtaryn boıyna sińirgen, eldi bolashaqqa bastap júretin maman tárbıeleý.
«Mine, osy turǵydan alǵanda qanshama jańa tehnologııany engizgenimen, qundylyqtar jáne orta qalyptastyrý máselesi tur. Basqarý júıesin ózgertý bir kúndik sharýa emes. «Batpandap kirgen mysqyldap shyǵady» degen sóz bar. Áli de bolsa muǵalim sabaq berip, bilim alýmen qatar túrli qaǵaz toltyrý, esep berýge kóp ýaqyt bóledi. Bul jumystar onyń kóp ýaqytyn, energııasyn alady. Oqý oryndary da talaı esep qujattaryn toltyrady. Rektordy, dırektordy taǵaıyndadyńyz ba, oǵan senim bolýy kerek. Mysaly, elordadaǵy mınıstrliktegi ınspektorǵa degen senim rektorǵa artylǵan senimnen joǵary bolmaýy kerek. Rektor muǵalimderge tolyq senip, ony jumys nátıjesi boıynsha baǵalaýy tıis»,-deıdi Astana memlekettik qyzmet haby (ACSH) basqarýshy komıtetiniń tóraǵasy.