Álıhan Áskerbaı Astanada aýyr atletıkadan Azııa chempıony atandy

ASTANA. KAZINFORM - Qazaqstandyq aýyr atlet Álıhan Áskerbaı Astanada ótip jatqan jasóspirimder men jastar arasyndaǵy Azııa chempıonatynda altyn medal jeńip aldy.

Otandasymyz úsh Azııa rekordyn jáne úsh álem rekordyn jańartty.

Qossaıystyń qorytyndysy boıynsha qazaqstandyq ziltemirshi 310 (141+169) kelini eńserdi. Jasóspirimder arasyndaǵy jarysta ol birinshi orynǵa ıe boldy.

Sondaı-aq Álıhan Áskerbaı jastar arasyndaǵy Azııa chempıonatynda da júldeger atanyp, qola medaldi enshiledi.

Aıta ketsek, buǵan deıin el qorjynyna eki medaldi Ksenııa Prozorova salǵan bolatyn. Ol U17 sanatynda birinshi orynǵa ıe bolyp, 20 jasqa deıingi atletter arasynda kúmis júldeger atandy.

Al 48 kelige deıingi salmaq dárejesinde (A toby) synǵa túsken Snejana Kashkarova julqa kóterýde 69 kelini baǵyndyryp, qola júldege ıe boldy. Al serpe kóterýde ol 82 kelini eńserdi.

Aıta keteıik, chempıonat 4-10 shilde aralyǵynda Qazaqstan sport kesheninde ótedi.

Qurlyqtyq dodaǵa Ózbekstan, Qytaı, Úndistan, Vetnam, Taıland, Ońtústik Koreıa, Kýveıt jáne Azııanyń ózge de 25 memleketinen 300-den astam sportshy keldi.