Álıev 2026 jyly Ázerbaıjanda TMU elderiniń áskerı jattyǵýlaryn ótkizýdi usyndy
ASTANA.KAZINFORM - Túrki memleketteri uıymyna múshe memleketter basshylary keńesiniń XII sammıtinde sóz sóılegen Ázerbaıjan prezıdenti Ilham Álıev uıymǵa múshe elder arasyndaǵy birlik pen yntymaqtastyqty, ásirese qorǵanys pen qaýipsizdikti odan ári nyǵaıtýǵa shaqyrdy, dep habarlaıdy Kazinform tilshisi.
- Qazirgi zamanǵy geosaıası syn-qaterler men qaýipsizdik qaterleri aıasynda, ásirese halyqaralyq quqyq normalary men qaǵıdattarynyń buzylýy jaǵdaıynda túrki memleketteriniń birtutas kúsh ortalyǵy retinde áreket etýi óte mańyzdy, - dedi prezıdent Ilham Álıev.
Ol qaýipsizdik turaqty damýdyń irgeli sharty ekenin, halyqaralyq normalar jıi buzylyp jatqan qazirgi kezeńde túrki elderiniń áskerı jáne áskerı-tehnıkalyq salalardaǵy yntymaqtastyǵy erekshe mańyzdy ekenin atap ótti.
- Elderimizdiń qorǵanys pen qaýipsizdik salasyndaǵy keń aýqymdy yntymaqtastyǵyn eskere otyryp, 2026 jyly Ázerbaıjanda Túrki memleketteri uıymyna múshe memleketterdiń birlesken áskerı jattyǵýlaryn ótkizýdi usynamyn, - dedi Ilham Álıev.
Memleket basshysy qazirgi zamanda áskerı kúsh – ár eldiń táýelsizdigi men aýmaqtyq tutastyǵynyń eń mańyzdy faktory ekenine toqtalyp, túrki memleketteriniń qorǵanys áleýeti men birligin nyǵaıtý búkil óńirdiń beıbitshiligi, turaqtylyǵy men ornyqty damýy isine qyzmet etetinin atap ótti.
Aıta keteıik, Gabalada ótken Túrki memleketteri uıymyna múshe memleketter basshylary keńesiniń 12-shi Sammıti aımaqtyq jáne halyqaralyq ózekti máselelerdi talqylaý, sondaı-aq saıası, ekonomıkalyq, kólik jáne gýmanıtarlyq salalardaǵy yntymaqtastyqty odan ári nyǵaıtý úshin múshe memleketterdiń basshylary men baqylaýshylaryn jınady.
Qazaqstan prezıdenti Qasym-Jomart Toqaev Gabalada ótken Túrki memleketteri uıymynyń 12-sammıtinde sóz sóılep, biriktirilgen aýmaqtyq qaýymdastyqtar úshin Tsıfrlyq ınnovatsııalar ortalyǵyn qurýdy usynǵany týraly buǵan deıin habarlanǵan bolatyn.