Álibek Qýantyrov transfertterge túsinik berdi
«Bıýdjetaralyq qatynastardyń qoldanystaǵy júıesi aldyńǵy qatarly halyqaralyq tájirıbege saı keledi dep atap ótken jón. Damyǵan elderde transfertter óńirlerge bıýdjettik shyǵystar men kirister múmkindigi arasyndaǵy aıyrmashylyqty jabýǵa bólinip, arnaýly sıpatqa ıe emes. Álemdik tájirıbedegi kópshilik maquldaǵan osyndaı qadam aǵymdaǵy shyǵystardy jergilikti bıýdjetterge obektıvti bólýge qamtamasyz etedi. Sáıkesinshe, bıýdjet qarajaty esebinen usynylatyn kepildik etilgen memlekettik qyzmetterge barsha óńirdiń halqyna teń qoljetimdik eskerilgen. Bıýdjetaralyq qatynastardy jetildirý boıynsha jumys turaqty negizde júrgiziledi. Nátıjesinde, jergilikti bıýdjetter parametrlerinde ońtaıly ózgeristi baıqap otyrmyz», - dedi Á. Qýantyrov bıýdjetaralyq qatynastardy jetildirý taqyrybyndaǵy Úkimet saǵatynda.
Onyń aıtýynsha, sońǵy úsh jylda jergilikti atqarýshy organdardyń boljamǵa qaraǵanda jeke kirister boıynsha asyra oryndaý kólemi 117 paıyzdy qurap, olardyń damý bıýdjeti 106 paıyzǵa ósti. Ortalyqqa táýeldilik 2019 jyldaǵy 59 paıyzdan 2021 jyly 56 paıyzǵa deıin qysqardy.
«Sonymen qatar, jekelegen óńirlerdiń maqsatty transfertterge táýeldiliginiń saqtalýy únemi synǵa ushyrap jatady. Bıýdjettik protsesti jetildirý úshin bizde tıisti rezervter bar», - dedi mınıstr.
Onyń sózine qaraǵanda, maqsatty aǵymdaǵy transfertterdiń negizgi kólemi áleýmettik salaǵa tıesili. Bular áleýmettik sala jumyskerleriniń, ishki ister organdary men basqa da salalar qyzmetkerleriniń eńbegin tóleýdi arttyrýǵa baılanysty shyǵystardyń shamamen 70 paıyzy.
«Bul shyǵystar qoldanystaǵy úsh jyldyq transfertterdiń kezeńinde paıda boldy jáne olar 2023-2025 jyldarǵa jalpy sıpattaǵy transfertterdi esepteý kezinde jergilikti bıýdjetter bazasyna beriledi. Atap ótsek, jeke óńirlerdiń táýeldiligi óńirlik mártebeniń ózgerýimen túsindiriledi», - dedi vedomstvo basshysy.
