Álibek Qýantyrov BUU Óńirlik ortalyǵyn Almaty qalasynda qurýǵa qatysty pikir bildirdi

ASTANA. QazAqparat – Birikken Ulttar Uıymynyń Óńirlik ortalyǵyn Almaty qalasynda qurý baǵytynda tıisti qadamdar jasalyp jatyr. Bul týraly Ornyqty damý maqsattarynyń iske asyrylýyna monıtorıng júrgizý jónindegi parlamenttik komıssııanyń otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«2022 jylǵy maýsymda Almatyda Ortalyq Azııa elderi úkimet basshylarynyń qatysýymen Ornyqty damý maqsattary boıynsha óńirlik sammıt ótkizildi. Sammıt óńirdegi eń kúrdeli máselelerdi sheshý, tájirıbe men bilim almasý, búkil aımaqtyń ıgiligi úshin turaqty sheshimderdi ázirleý úshin belsendi platformany qamtamasyz etýge baǵyttaldy. Qazirgi kezde Ortalyq Azııa men Aýǵanstan úshin Ornyqty damý maqsattary boıynsha Birikken Ulttar Uıymynyń Óńirlik ortalyǵyn Almaty qalasynda qurý boıynsha tıisti jumys eskerilgen», - dedi Á. Qýantyrov.

Sonymen qatar ol Qazaqstan jyl saıyn Ornyqty damýdyń jahandyq reıtıngine qatysatynyn aıtty.

«Kembrıdj ýnıversıteti jasaǵan reıtıngke sáıkes, Birikken Ulttar Uıymynyń Ornyqty damý maqsattary boıynsha elderdiń jetistikteri anyqtalady. 2022 jyldyń qorytyndysy boıynsha Qazaqstan 100 baldan 71,1 ball jınap, 2019 jylmen salystyrǵanda 77-inshi orynnan 65-inshi orynǵa deıin, ıaǵnı 12 orynǵa kóterildi», - dedi mınıstr.

Budan buryn habarlanǵandaı, búgin elordada Ornyqty damý maqsattarynyń iske asyrylýyna monıtorıng júrgizý jónindegi Parlamenttik komıssııanyń alǵashqy otyrysy ótti.

Álibek Qýantyrovtyń sózine qaraǵanda, ulttyq jobalar men tujyrymdamalarǵa, memlekettik damý josparlaryna Ornyqty damý maqsattary boıynsha mańyzdy kórsetkishteriniń 60 paıyzdan astamy engizilgen.

Aıta keteıik, bıyl maýsym aıynyń basynda Astana halyqaralyq forýmynda Memleket basshysy Qasym-Jomart Toqaev Almatyda Ortalyq Azııa men Aýǵanstan úshin ornyqty damý maqsattary boıynsha BUU Óńirlik ortalyǵyn qurý mańyzdy ekenin aıtty.