Álibek Qýantyrov Batys Qazaqstan oblysyndaǵy áleýmettik nysandardy aralady

ChAPAEV. QazAqparat – BQO-ǵa jumys sapary barysynda Ulttyq ekonomıka mınıstri Álibek Qýantyrov «Aýyl – el besigi» sheńberinde iske asyrylǵan jobalardyń sapasyn baǵalady, dep habarlaıdy QazAqparat mınıstrliktiń baspasóz qyzmetine silteme jasap.

Atalǵan baǵdarlama boıynsha óńirde áleýmettik nysandar salynyp, joldar jóndelip, kósheler jaryqtandyryldy. UEM basshysy Aqjaıyq aýdany Chapaev aýylyndaǵy 320 oryndyq dene shynyqtyrý-saýyqtyrý keshenine bardy. Nysan 2020 jyly salyna bastalǵan. Alaıda qurylys materıaldarynyń qymbattaýyna baılanysty jumys toqtatylǵan edi.

Jobanyń quny – 445 mln teńge. Búginde jumys 90% oryndalǵan: jyldyń sońyna deıin tolyq aıaqtaý josparlanyp otyr. Nysan áleýmettik jaýapkershiligi sheńberinde Qarashyǵanaq Petrolıým Opereıtıng (KPO) qarajaty esebinen salynýda. Sondaı-aq ol kentishilik joldardyń aǵymdaǵy jaǵdaıymen tanysyp, 2019 jyly kúrdeli jóndeý júrgizilgen balalar men jasóspirimder sport mektebine bardy.

Eki qabatty ǵımaratta sportpen shuǵyldanýǵa barlyq jaǵdaı jasalǵan, keń zaldar, kıim aýystyratyn jáne jýynatyn jyly bólmeler bar. Barlyq sektsııalar tegin. Munda 1500-den astam oqýshy sportpen aınalysady.

Jattyqtyrýshylar ártúrli sport túrlerinen Qazaqstannyń chempıondaryn jáne júldegerlerin tárbıelegen.

Osy jyly «Aýyl – el besigi» sheńberinde Batys Qazaqstan oblysynda 15 jobany júzege asyrýǵa 4,8 mlrd teńge bólindi.