Álibek Qýantyrov aldaǵy 5 jyldaǵy ınflıatsııa deńgeıine boljam jasady

ASTANA. QazAqparat – 2023 jyly elimizdiń jalpy ishki óniminiń naqty ósimi 4 paıyzdy quraıdy. Bul týraly Senattyń jalpy otyrysynda eldiń 2023-2027 jyldarǵa arnalǵan áleýmettik-ekonomıkalyq damýynyń boljamy jaıynda baıandaǵan Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Boljam 2021 jyly ekonomıkanyń ósýi boıynsha qorytyndy derekterin, halyqaralyq qarjy uıymdarynyń álemdik ekonomıkanyń ósýi men eksporttyq taýarlar baǵasy boıynsha kútýlerin eskere otyryp qalyptastyryldy. Bul rette, halyqaralyq qarjy uıymdarynyń konsensýs-boljamyna sáıkes 2022 jyly munaıdyń álemdik baǵasy barreline 104,2 AQSh dollary deńgeıinde kútilýde. 2023 jyly álemdik ekonomıkanyń ósýi 3 paıyzdy quraıdy. Boljam men bıýdjettik parametrlerdi qalyptastyrýdyń negizi retinde bazalyq stsenarıı alyndy. Osy stsenarıı boıynsha munaıdyń ortasha baǵasyn barreline 85 dollar deńgeıinde qalyptasady. Jalpy ishki ónimniń ortasha jyldyq naqty ósýi 3,9 paıyzdy quraıdy», - dedi ol.

Mınıstrdiń dereginshe, ınflıatsııa 2023 jyly – 7,5-9,5 paıyz deńgeıinde, 2024 jyly – 4-5 paıyz, 2025-2027 jyldary 3-4 paıyz deńgeıinde belgilendi.

«Jalpy ishki ónimniń naqty ósýi 2023 jylǵy 4 paıyzdan 2027 jyly 4,2 paıyzǵa deıin jedeldetiledi dep kútilýde. Nomınaldy jalpy ishki ónim 120,7 trln teńgeden 176,6 trln teńgege deıin ósedi. Munaı óndirý 2023 jyly 92,6 mln tonnany qurap, 2027 jyly 99,9 mln tonnaǵa deıin ulǵaıady. Ulttyq banktiń boljamy boıynsha eksport 80,9 mlrd AQSh dollarynan 84,6 mlrd AQSh dollaryna deıin, ımport 45,7 mlrd AQSh dollarynan 53,5 mlrd AQSh dollaryna deıin ósedi», - dedi Álibek Qýantyrov.

Foto: inbusiness.kz