Álibek Asqarov, jazýshy: Rýhanı jańǵyrýdyń negizgi ustyny - birtutas ult bolý

ASTANA. QazAqparat - «Bul jolǵy rýhanı jańǵyrýdyń jóni bólek, mańyzy elimiz úshin aıryqsha ekeni daýsyz. Onyń negizgi ustyny - Birtutas Ult bolý jolyna kóship, kemel keleshegimizdi jan-jaqty ári tereń zerdeleýge arnalyp otyr». Bul týraly «Egemen Qazaqstan» gazetinde jarııalanǵan jazýshy, Memlekettik syılyqtyń laýreaty, Álibek Asqarovtyń Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevtyń «Bolashaqqa baǵdar - rýhanı jańǵyrý» atty maqalasyna oraı bildirgen pikirinde aıtylǵan.

«Asa mártebeli Nursultan Ábishuly! Biz - kitaphanashylar, bıblıograftar, arhıvısterdiń ujymy bolyp otyrǵan Ulttyq memlekettik Kitap palatasy atynan rýhanı jań­ǵyrýǵa baılanysty bolashaqqa baǵdarymyzben tanysyp, bar­shamyzdyń zor qýanyshqa bólenip otyrǵanymyzdy Sizge jetkizgimiz keledi.

Bul baǵdardy zııaly qaýym kópten kútken. Kóktem shýaǵymen jetken jaqsylyq habardaı boldy. Jyl basynda jarııalanǵan týǵan elimizdiń Úshinshi jańǵyrýy bastalǵan soń saıası jáne ekonomıkalyq jańǵyrýdy jarııaladyńyz. Ózińiz aıtqandaı, etek-jeńimizdi jınap, ekonomıkamyzdy nyqtap alsaq, qalǵan ıgilikter de ret-retimen júzege asa jatar degen sózińizdiń oryndalyp jatqanyna kýá bolýdamyz», - deıdi jazýshy.

Sondaı-aq ol rýhanı jańǵyrý búginnen bastalmaǵanyn, Táýelsizdigimizdiń 25 jylynda tarıhymyzdy ulyqtaǵan, mádenıetimizdi kótergen, joǵymyzdy taýyp, barymyzdy baıytqan kóptegen tyndyrymdy jumystar jasalǵanyn aıtady.

«Biraq bul jolǵy rýhanı jańǵyrýdyń jóni bólek, mańyzy elimiz úshin aıryqsha ekeni daýsyz.

Onyń negizgi ustyny - Birtutas Ult bolý jolyna kóship, kemel keleshegimizdi jan-jaqty ári tereń zerdeleýge arnalyp otyr.

Bolashaqty baıandy etý jolyndaǵy bul teńdessiz tarıhı múmkindikti biz barynsha paıdalanamyz dep ýáde beremiz. Osy jolda barsha kásibı bilimimizdi, qaıratymyz ben kúsh-jigerimizdi aıanbaı jumsaımyz dep Ózińizdi sendiremiz», - dep jazady Ulttyq memlekettik Kitap palatasy ujymy atynan Álibek Asqarov.