Alibaba tarıhyndaǵy eń qýatty jasandy ıntellekt modelin tanystyrdy
ASTANA. KAZINFORM — Qytaıdyń Alibaba kompanııasy jańa býyndaǵy Qwen3.8-Max tildik modelin tanystyrdy. Ázirleýshilerdiń aıtýynsha, ol baǵdarlamalaý, logıkalyq taldaý jáne uzaq ýaqyt boıy avtonomdy tapsyrmalardy oryndaý múmkindikterimen erekshelenedi, dep habarlaıdy Sınhýa.
Jańa nusqa Qwen modelder jelisindegi eń aýqymdy jańartý boldy. Onyń kólemi 2,4 trıllıon parametrdi quraıdy jáne 1 mıllıon tokenge deıingi kontekstik terezeni qoldaıdy.
Táýelsiz Arena platformasynyń málimetinshe, Qwen modelderi álemdegi eń ónimdi iri tildik modelderdiń qataryna kiredi.
Ázirleýshilerdiń aıtýynsha, Qwen3.8-Max avtonomdy baǵdarlamalaý salasynda aıtarlyqtaı jetildirilgen. Model adamnyń aralasýynsyz uzaq ýaqyt kúrdeli tapsyrmalardy oryndap, jumys barysynda óz betinshe sheshim qabyldaı alady.
Synaq kezinde jasandy ıntellektige nólden bastap ózin-ózi damytatyn ıntellektýaldy agent júıesin jasaý tapsyryldy. Nátıjesinde paıdalanýshylardyń pikirleri, qaýymdastyqtyń úzdik tájirıbeleri jáne modeldiń ózindik synaq nátıjelerin biriktiretin Loop Engineering freımvorki jasaldy.
Kodty generatsııalaý, tekserý, aldyn ala qaraý jáne jýrnaldardy taldaý kezeńderinen keıin júıe oh-my-cli atty ashyq agenttik freımvorkti ázirledi. Joba GitHub platformasynda ashyq bastapqy kodpen jarııalandy.
Qytaılyq kompanııalar jasandy ıntellekt tehnologııalaryn qarqyndy damytýdy jalǵastyryp keledi. Shilde aıynda Moonshot AI startapy 2,8 trıllıon parametri bar Kimi K3 modelin tanystyrǵan bolatyn. Kompanııanyń málimetinshe, bul parametrler sany boıynsha álemdegi eń iri ashyq bastapqy kodty jasandy ıntellekt modeli.
Sarapshylardyń pikirinshe, qytaılyq ázirleýshiler ashyq úlgidegi jasandy ıntellekt modelderine kóbirek basymdyq bere bastady. Mundaı tásil tehnologııalardyń jyldam damýyna yqpal etip, olardy álemdik naryqta qoldaný múmkindigin keńeıtedi.
Buǵan deıin Eýroodaqta 2 tamyzdan bastap JI-ge qatysty jańa erejeler kúshine enetini týraly habarlandy. Sol kúni jasandy ıntellekt júıeleriniń ashyqtyǵyna qatysty jańa talaptar da kúshine endi.
