Alibaba negizin qalaýshy Djek Ma bir jyldan keıin Qytaıǵa oraldy

GONKONG. QazAqparat – Alibaba negizin qalaýshy jáne Qytaıdaǵy eń baı adamdardyń biri Djek Ma bir jyldan keıin kópshilik aldyna shyqty, dep habarlaıdy QazAqparat Bloomberg basylymyna silteme jasap.

58 jastaǵy mıllıarder Chjetszıan provıntsııasy Hanchjoýdaǵy mektepke barǵan.

Ma 2020 jyly Qytaıdyń qarjy retteýshilerin synaǵannan keıingi úsh jylda kópshilik aldyna shyqqan joq.

Ol - tehnologııalyq kásipkerlerge qarsy repressııa kezinde joǵalyp ketken Qytaı mıllıarderleriniń biri.

South China Morning Post habarlaýynsha, ol bir jyl shetelde bolyp, jaqynda ǵana Qytaıǵa oralǵan.

Alibaba-ǵa tıesili basylym ol Gonkongta shamaly aıaldap, dostarymen kezdesip, Art Basel halyqaralyq sýret jármeńkesine qatysqanyn jazdy.

Sonymen qatar keıingi úsh jylda Ma myrza kompanııalaryndaǵy qyzmetinen de alystap, aýylsharýashylyǵy tehnologııalary týraly kóbirek bilý maqsatynda túrli elderge saıahattaǵany belgili boldy.

BBC News Djek Manyń Ant Group qarjylyq tehnologııalar alybyn baqylaýdan bıyl qańtarda bas tartqanyn eske saldy.

Keıbir sarapshylar muny óziniń shekten tys ashyqtyǵy men bedeliniń saldarynan Qytaı kompartııasynyń qaharyna ilikkeniniń dáleli dep qabyldady.

2020 jyldyń qazanynda Shanhaıdaǵy qarjy konferentsııasynda Ma dástúrli bankterde «lombard mentalıteti» bar ekenin málimdedi.

Kelesi aıda Ant josparlaǵan, álemdegi eń iri yqtımal operatsııa - 26 mıllıard fýnt sterlıngti qarjy naryǵyna engizýdi Qytaı bıligi toqtatty.

Sodan beri Djek Many túrli elderde – Ispanııa, Nıderland, Taıland pen Aýstralııada kórdik degen aqparattar tarady.

Byltyr qarashada Financial Times gazeti Alibaba negizin qalaýshynyń alty aıdan beri Japonııa astanasy Tokıoda turyp jatqanyn habarlady.