Alibaba, Microsoft, Sony, Telegram kompanııalarynyń Qyrǵyzstandaǵy servısteri jabylyp qalýy múmkin
ASTANA. KAZINFORM – Qyrǵyzstanda salyqtyq tirkeýi bolmaýyna baılanysty el azamattaryna elektrondyq qyzmet kórsetetin 11 sheteldik kompanııa servısiniń jumysy shektelýi múmkin, dep habarlaıdy Kazinform agenttiginiń Bishkektegi menshikti tilshisi.
Memlekettik salyq qyzmeti qyrǵyzstandyqtar arqyly qomaqty tabys taýyp otyrǵan, biraq mindetti salyqtyq tirkeýden ótpegen birqatar sheteldik uıymdy anyqtady. Olar:
• Alibaba Group Holding Limited (1688);
• Shanghai Xunmeng Information Technology Co., Ltd. (Pinduoduo);
• Twitch Interactive, Inc.;
• Microsoft Corporation;
• Valve Corporation;
• Sony Interactive Entertainment LLC;
• Epic Games Inc.;
• Electronic Arts Inc.;
• VK Company Limited;
• Telegram FZ-LLC;
• Dropbox Inc.
Qyrǵyzstannyń zańnamasyna sáıkes, bul platformalar salyqtyq tirkeýden ótýge jáne sonyń aıasyndaǵy mindettemelerin oryndaýǵa mindetti. Elektrondyq qyzmet túrlerine baǵdarlamalyq qamtý, onlaın-oıyndar, ınternet jelisinde jarnama ornalastyrý, hostıng jáne málimetterdi saqtaý, tsıfrlyq kontentti paıdalanýǵa ruqsat berý jáne taǵy da basqalar jatady.
2024–2025 jyldary joǵaryda kórsetilgen kompanııalardyń atyna jalpy somasy 13,2 mlrd somnan asatyn 15,9 mln-ǵa jýyq aqshalaı aýdarymdar jasalǵan.
Solardyń ishinde eń kóp qarajat kelesi kompanııalarǵa aýdarylǵan:
- Shanghai Xunmeng Information Technology Co., Ltd. — 8,89 mlrd som;
- Alibaba Group Holding Limited (1688) — 2,83 mlrd som;
- Microsoft Corporation — 1,01 mlrd som.
Memlekettik salyq qyzmeti atalǵan kompanııalarǵa birneshe ret resmı túrde túsindirme hat joldaǵanyn, sonyń ishinde dıplomatııalyq arnalar arqyly Qyrǵyz Respýblıkasynyń Syrtqy ister mınıstrligi atynan da habar bergenin málimdedi. Áıtse de, osy ýaqytqa deıin olardan eshqandaı jaýap bolmaǵan.
- Salyqtyq mindettemeler odan ári oryndalmaǵan jaǵdaıda salyq organdary zańnamada kózdelgen sharalardy qabyldaıdy, sonysalyqń ishinde Qyrǵyz Respýblıkasynyń aýmaǵynda tıisti kompanııalardyń elektrondyq servısteriniń jumysyna shekteý qoıý máselesi boıynsha quzyretti organdarǵa júginedi, - delingen salyq organy taratqan málimette.
Buǵan deıin Qyrǵyzstanda jekelegen baǵyttaǵy kásipkerler úshin bes jyldyq salyq demalysyn engizý usynylyp otyrǵany habarlanǵan bolatyn.
Biz sondaı-aq Qyrǵyz Respýblıkasynyń Memlekettik salyq qyzmeti óz shtatyn jappaı qysqartyp jatqany týraly jazǵan bolatynbyz.
Raıhan Rahmetova
