Alibaba men Wildberries Qazaqstan naryǵyna ne usynyp otyr
ASTANA. KAZINFORM — Astana International Trade Forum alańynda Qazaqstanda tanymal marketpleısterdiń ókilderi «CEO Talks: Bólshek saýdanyń kóshbasshylary — 2025 baǵyty» sessııasyna qatysty, dep habarlaıdy Saýda jáne ıntegratsııa mınıstrligi.
Búginde marketpleıster qazaqstandyqtarǵa ne usynyp otyrǵany talqylandy.
Ortalyq Azııadaǵy Alibaba (Qytaı) kompanııasynyń ókili Chıngız Sher qazaqstandyq óndirýshilerge ónimderin aldymen Alibaba arqyly synap kórýdi, sodan keıin Qytaı men Ońtústik Azııa naryǵyna shyǵýdy usyndy.
— Alibaba bul múmkindikterdi óte jeńil usynady. Siz óndirýshi retinde óz taýaryńyzdy qaıda sata alatynyńyzdy, kimge qyzyqty ekenin synaı alasyz. Platformaǵa qosylyp, jumys isteý qajet, — dedi ol.
Wildberries-tiń Qazaqstandaǵy korporatıvtik baılanys jónindegi dırektory Qazbek Qujymov marketpleıstiń qazaqstandyq tutynýshylarǵa qalaı beıimdelip jatqanyn aıtty.
— Búginde Wildberries-te 120 myńǵa jýyq satýshy — Qazaqstannyń rezıdentteri. Astana men Almatyda óz logıstıkalyq ortalyqtarynyń qurylysy bizdiń baǵalaýymyzsha óńir ekonomıkasynyń orta eseppen 5%-ǵa deıin ósýine yqpal etedi. Bul bir ǵana ınfraqurylymdyq nysan úshin úlken kórsetkish. Biz únemi jańa servıster usynyp, satýshylardy oqytyp, jańa kásipkerlerdi tartýǵa tyrysamyz, — dedi Qazbek Qujymov.
Budan basqa, onyń sózinshe Wildberries qazaqstandyq kásipkerler úshin jańa servısterdi belsendi engizedi jáne qosymshany satyp alýshylar úshin yńǵaıly etedi.
— Biz Qazaqstannan kelgen satýshylarǵa arnalǵan jańa servısterdi únemi synaqtan ótkizip, engizip kelemiz. Jaqynda satýshynyń kúshimen jedel jetkizý jáne esikke deıin jetkizý qoljetimdi boldy, endi gúl býketine nemese azyq-túlikke, iri kólemdi jıhaz ben tehnıkaǵa tapsyrys berýge bolady jáne osynyń bári qysqa merzimde jetkiziledi. Sondaı-aq, qazirgi ýaqytta saıt pen qosymshany qazaq tiline aýdaryp jatyrmyz, 2 mln-ǵa jýyq taýar kartochkasy aýdaryldy jáne bul baǵyttaǵy jumys áli de jalǵasýyp jatyr, — dedi Qojymov.
Al Halyk Finservice (Halyk Market marketpleısi) basqarma tóraıymy Móldir Rysálıeva jekelendirilgen marketıng týraly aıtty.
— Klıent tartýǵa ketetin shyǵyndy 50%-ǵa deıin qysqartýǵa jekelendirilgen marketıng kómektesedi. Bizde tutynýshy minez-qulqyn tolyq zertteıtin derekter fabrıkasy dep atalatyn bólim bar. Olar klıenttiń qaıda júrgenin, qaıda aqsha jumsaıtynyn, qandaı sanattardy unatatynyn taldaıdy. Mysaly, áýejaıda bolsańyz, medıtsınalyq saqtandyrý satyp alýdy eske salatyn SMS keledi. Saýda ortalyǵyna barsańyz — avtoturaq aqysyn tóleýdi umytpaýdy eskertemiz. Osyndaı tásildi biz adamdarǵa izdep júrgen taýarlaryna sáıkes keletin usynystar berý úshin qoldanamyz, — dedi Móldir Rysálıeva.
Osydan buryn Ozon, Wildberries sııaqty marketpleıstermen saýda jasaıtyndar neni bilý kerek ekenin jazǵanbyz.