Alibaba DeepSeek-pen teń dárejede básekelese alatyn jańa jasandy ıntellekt modelin shyǵardy

ASTANA. KAZINFORM – Alibaba kompanııasynyń bólimshesi ashyq kodty jańa QwQ-32B atty jasandy ıntellekt modelin shyǵardy, ári onyń ónimdiligi DeepSeek-R1 modeline teń ekenin málimdedi. Bul týraly Qytaıdyń The Paper basylymy habarlady, dep jetkizedi Kazinform agenttiginiń menshikti tilshisi.

QwQ-32B modeli nebári 32 mıllıard parametrden turady, alaıda onyń ónimdiligi DeepSeek-R1 modeline teń keledi. Aıta ketsek, DeepSeek-R1 jalpy 671 mıllıard parametrge ıe, biraq sonyń 37 mıllıardy ǵana belsendi.

Habarlanǵandaı, aýqymdy kúsheıtilgen oqytý protsesiniń arqasynda QwQ-32B modeli matematıka, kodtaý jáne jalpy qabiletter boıynsha sapaly serpiliske qol jetkizgen.

Eske sala keteıik, DeepSeek atty qytaılyq startaptyń 2025 jyldyń qańtarynda DeepSeek-R1 jasandy ıntellekt chat-botyn iske qosýy álemdik ІT-naryqta «tańdanys» týdyrǵan edi.

Aıta ketelik DeepSeek-ti paıdalanýǵa tyıym salǵandardyń qatary ósip keletini týraly jazǵan edik.