Álı Oqapov Ýnıversıadaǵa arnap beınebaıan túsirdi
ASTANA. QazAquparat - 24 qańtarda «Gákkýdiń» Ýoutube-tegi arnasyna shyǵarylǵan «Jeńimpaz» ánin qazirdiń ózinde 30 myńǵa tarta adam kórip shyqqan. Mýzykany Ýnıversıadanyń elshisi jáne ándi oryndaýshy Álı Oqapovtyń ózi, al sózin Marhaba Sábıeva jazdy. Klıp rejısseri - Ernar Nurǵalıev. Bul týraly Ýnıversıadanyń arnaıy saıty habarlaıdy.
«Jeńimpaz» - konkımen júgirýshiler, hokkeıshiler, tramplınnen sekirýshiler, mánerlep syrǵanaýshylar sekildi 4 sport túrindegi qazaqstandyq sportshylardyń kúndelikti ómirin kórsetýge arnalǵan áleýmettik-motıvatsııalyq klıp. Sondaı-aq, oǵan jas mánerlep syrǵanaýshy Gúljan Jumadilova da tústi. «Biz sportshylar jeńiske jetý úshin qanshama kúsh salatynyn kórsetkimiz keldi, - deıdi Álı Oqapovtyń dırektory Erlan Álimov. - Osyndaı ánderdi tyńdaý arqyly jastar, qarapaıym qazaqstandyqtar óz bıikterin baǵyndyrýǵa shabyt alady».
Erlan Álimovtyń aıtýynsha, ándi jazý ıdeıasyn bastapqyda Álıdiń ózi kótergen eken, keıinirek bul ıdeıa basqa adamdardyń tarapynan da qoldaý taýypty. «Biz basqa sportshylardan túsirilimge qatysyp, kómek kórsetýdi ótindik. Alaıda, ókinishke oraı, olar jıyndardan qoldary bosamady, sondyqtan kópshiligi qatysa almady. Klıp Ýnıversıadaǵa daıyndyq qyzǵan shaqta 3-4 qańtarda túsirilgen edi. Degenmen, biz oǵan qatysa alǵan Qazaqstannyń ulttyq qurama múshelerimen qýana-qýana jumys jasadyq. Bolashaǵynan úlken úmit kúttirip otyrǵan Qazaqstannyń eki dúrkin chempıony, bizdiń jas mánerlep syrǵanaýshymyz Gúljan Jumadilovany túsirý ásirese qyzyqty ótti».
Klıpte tamashalaýǵa bolatyn kostıýmderdiń barlyǵy arnaıy klıp úshin tigildi. Klıp túsirilimi «Almaty Arena» jáne «Halyq Arena» muz saraılary, «Medeý» muz aıdyny, «Shymbulaq», Balýan Sholaq atyndaǵy sport saraıy, «Suńqar» tramplınder kesheni jáne Atletter aýyly sekildi Ýnıversıadanyń nysandarynda ótkizildi.
Taıaý kúnderi klıp «Gákký», «Hıt TV», MuzLife, Muzzone, NTK, «31 arna», «Qazaqstan», «Almaty», «Astana», «Habar» sekildi barlyq úlken arnalarda kórsetile bastaıdy.
