Álı Oqapov «Qazaqstan daýysy» jobasynyń fınalıci Indıra Edilbaevaǵa prodıýser boldy
ASTANA. QazAqparat - Ánshi Álı Oqapov pen dırektory Erlan Alımov resmı túrde jańa jobalaryn tanystyrdy, dep jazady baistars.kz.
Ánshi men dırektory arnaıy tilshilermen kezdesý ótkizip, resmı túrde jobalarynyń atyn jarııalap, birge suhbat berdi. Kezekti jańa jobasy birneshe kún buryn ǵana aıaqtalǵan «Qazaqstan daýysy» megajobasynyń fınalısi Indıra Edilbaeva esimdi jas arý. Endi Indıranyń mýzykalyq prodıýseri - Álı Oqapov, al prodıýseri - Erlan Alımov.
«Jalpy Indıramen tanys bolǵanymyzǵa 2 jyldaı ýaqyt boldy. Bir-birimizdi ortaq tanystarymyz arqyly biletinbiz. Osydan birneshe aı buryn dırektorym Erlan maǵan «jańa joba alaıyq» dep usynys jasaǵan bolatyn. Sodan biz ǵalamtor arqyly kastıng jarııaladyq. Nátıjesinde 400-ge jýyq hattar men usynystar kelip tústi. Ókinishke oraı kóbisi durys shart boıynsha jibermegen. Durys hat jibergenderdiń ishinen Indıranyń hatyn qabyldadyq. Alǵashynda tań qaldym. Sebebi, men osyǵan deıin Indıranyń jeke ánshi retinde bizben jumys istegisi kelgendigin bilgen joqpyn. Erlanǵa «Indırany tańdaımyn» dep aıttym. Keıinnen kezdesip, sóılesip, qandaı adam ekenin, minezin, josparlaryn bilgen soń osyndaı ortaq sheshimge keldik.
Indıra osydan eki jyl buryn ǵana Almatyǵa keldi. Negizi - Aqtóbelik. Osyǵan deıin de kóptegen án baıqaýlarǵa qatysyp júrgen qyz. Bizdiń kastıngten ótkenin estigende óte qýanyshty boldy. Sebebi, bundaı jaýap kútpegen eken. Meniń oıymsha, Indıra jartylaı bolsa da daıyn ánshi. Daýysynyń qýattylyǵy, án aıtý sheberligi, mýzykalyq qabileti óte bıik deńgeıde. Bala kezinen mýzykany súıip ósken jáne qarapaıymdylyǵy maǵan unaıdy. Adam retinde adamgershiligi mol, minezi áli kishkentaı baladaı, óte sulý. Osyndaı qasıettiń bári bir adamda jınalǵany óte qýantady. Sebebi, ózderińizde bilesizder kóbisinde túri bolsa án aıta almaıdy, al án aıta alsa túri kelmeı jatady.
Osydan birneshe kún buryn ǵana bilesizder «Qazaqstan daýysy» jobasy aıaqtalyp, Indıra fınalǵa deıin jetip, 3-oryn ıegeri atandy. Bul biz úshin úlken kórsetkish boldy. Osy joba arqyly halyqtyń Indıraǵa degen kózqarasyn bildik, tekserip aldyq. Birinshiden, Madına Sádýaqasovaǵa alǵysymdy aıtqym keledi. Madınasyz ol fınalǵa jetpes edi. Al jeńimpazǵa keletin bolsam, Baýyrjandy men moıyndaımyn. Ol - «Qazaqstan daýysy» ataǵyna laıyqty ánshi.
Jobadan keıin kóp ánshiler joq bolyp ketip jatady. Onyń ary qaraı ósýi tikeleı darynyna baılanysty. Osy oraıda biz Indıranyń sahnadan ketpeýine, joǵalmaýyna kúsh salamyz. Indıranyń óziniń qaıtalanbas daýysy bar. Án aıtý sheberligi joǵary. Biraq baǵyt jaǵynan áli eshteńe aıta almaımyz. Indıra jobada túrli janrda óz-ózin synady. Biraq áli bir naqty baǵytty tańdaǵan joqpyz.
Alda bizde Indıramen birge úlken josparlar bar. Qazir 6-7 avtorlyq ánderi bar. Onyń ekeýin men ózim jazdym. 2-3 fotosessııasy bar. Endi búginnen bastap resmı túrde suhbat bere alamyz», - dedi Álı Oqapov.
Al Erlan Alımov: «Indıranyń erekshelikteri kóp. Óte ádemi, talantty, tárbıeli qyz. Sonymen qatar, jumysqa degen jaýapkershiligi joǵary, eshqashan keshikpeıdi.
Men buryn ánshi bolǵanmyn. Sol kezden bastap prodıýser bolý oıymda júrdi. Qazir sol oıdy júzege asyryp jatyrmyn. Birinshi jobam Dınara Sultan boldy. Dınaramen kóptegen jumystar atqardyq.
Alda Indıramen eń birinshi jospar ol beınebaıan túsirý. Án daıyn tur, tek Indıranyń daýysyn jazý kerek. Osy 1-2 aptadan keıin beınebaıannyń túsirilim jumystary bastalady. Búgin Indırany tanystyryp, alǵashqy qadamymyzdy bastadyq. Alda áli josparlar kóp. Indıranyń daýysyna qarasaq, bolashaqta án baıqaýlarǵa barýǵa bolady»,- deıdi.
