Álı Oqapov «gollıvýdtyq fılmniń» basty rólin somdaıdy (FOTO)
ASTANA. QazAqparat - «Astana» telearnasynda bıylǵy jańa jyl keshi «Jap-jańa jyl-2016. Evolıýtsııa» degen erekshe ataýmen ótedi. Joba bıyl tórtinshi jyl óz jalǵasyn tabýda. Bul kúni kórermen kıno, sport jáne óner salasyndaǵy jyldyń eń tańdaýly tulǵalarymen kezdesedi. Kórermender án men ázil, kúı men bı jarasymyn tapqan keshte tanymal tulǵalardyń el bilmeıtin qyryn tanýǵa múmkindik alady.
Bul jańajyldyq keshti shoý-bıznes juldyzdary Baıan Esentaeva men Dınara Satjan júrgizip qana qoımaı, onyń kóńildi, maǵynaly bolyp shyǵýyna prodıýser rólinde óz úlesterin qosty. Al jańa jyldyq shoýdy gollıvýdtyq úlgide túsirýdi armandaıtyn rejısser - Nurdáýlet Shertim men aktrısa Aıgúl Imanbaeva kórermenniń aldynda jańa obrazda jarqyraıdy. Bıylǵy «Astana juldyzy» Ulttyq mýzyka báıgesiniń tizginin ustaǵan tanymal tórttik, kórermenderge esten ketpes jańa jyldyq dýman syılaýǵa daıyn. Sizderdi «Nurdáááýlet jáne onyń otbasy...» atty jańa telehıkaıanyń tusaýkeseri de tańǵaldyrmaı qoımaıdy.
Sońǵy jyldary «Astana» arnasynda joǵarǵy reıtıng kórsetetin «El aýzynda», «Toı jyry», «Kýhnıa», «Otkrytaıa stýdııa» baǵdarlamalarynyń merekelik shyǵarylymy kórermenge tartý bolmaq.
Tanymal rejısser - Nurdáýlet "Toı jyry" baǵdarlamasyn gollıvýdtyq úlgide túsirýdi josparlap, qazaqstandyq qyzdardyń armanyna aınalǵan Álı Oqapovty basty róldegi kúıeý jigittiń rólin somdaýǵa shaqyrady. Toıdyń qalaı ótkenin 31 jeltoqsan kúni tamashalaýǵa bolady.
Baǵdarlama barysynda áýezdi ánimen ázildi keshtiń kórkin keltiretin estrada juldyzdary da boı kórsetedi. Olardyń qatarynda Roza Rymbaeva, «Rin'GO» toby men «KeshYOU» toby, «Format» toby, Álı Oqapov, Aıqyn Tólepbergen, Nurlan Abdýllın syndy tanymal ártister bar.
Kórsetilim 31 jeltoqsan keshki saǵat 22-00-de bastalady. Qapy qalmańyzdar!
