Álı Hameneımen qoshtasý rásimi Irakta jalǵasty
ASTANA. KAZINFORM – Irandaǵy myńdaǵan adam qatysqan qaraly rásimderden keıin Islam revolıýtsııasynyń joǵarǵy jetekshisi Álı Hameneıdi eske alý sharalary Iraktaǵy shııtter úshin qasıetti sanalatyn qalalarda jalǵasty, dep habarlaıdy Kazinform tilshisi.
Qaraly sharalar sársenbi kúni Iraktyń Nadjaf qalasynda bastaldy. Buǵan deıin Hameneıdiń denesi Irannan osy qalaǵa jetkizilgenin ırandyq jáne ıraktyq BAQ habarlady.
Nadjaf halyqaralyq áýejaıynda ótken resmı qarsy alý rásimine Iran prezıdenti Masýd Pezeshkıan, Irak basshylyǵynyń ókilderi, dinı qaıratkerler jáne joǵary laýazymdy ırandyq áskerı tulǵalar qatysty.
Irak bıligi sársenbini demalys kúni dep jarııalady.
Imam Álı kesenesinde janaza namazy oqylǵannan keıin qaraly sherý kúsheıtilgen qaýipsizdik sharalarymen Nadjaf kósheleri arqyly ótti. Keıin Hameneıdiń denesi Kerbela qalasyna jetkizilip, rásimder ımam Hýseın men Abbas kesenelerinde jalǵasty.
Irannyń IRNA agenttiginiń málimetinshe, eldiń birinshi vıtse-prezıdenti Muhammad Reza Aref Nadjaf pen Kerbeladaǵy qaraly rásimderdiń ótkizilýi Iran men Irak halyqtary arasyndaǵy rýhanı, mádenı jáne dinı baılanysty bildiretinin aıtty.
Iraktyń Halyqtyq mobılızatsııa kúshteri qolbasshylyǵy Nadjaftaǵy sherýge 2,3 mıllıonnan astam adam qatysqanyn málimdedi.
Sherýge qatysýshylar Iran men Irak týlaryn, sondaı-aq Iran qoldaıtyn ıraktyq qarýly qurylymdardyń jalaýlaryn alyp shyqty. Іs-sharalarǵa Irak bıliginiń ókilderi, din qyzmetkerleri jáne kóptegen qajylar qatysty.
Iraktaǵy rásimder aıaqtalǵan soń Álı Hameneıdiń denesi Iranǵa qaıtarylady. Jerleý rásimi beısenbi kúni onyń týǵan qalasy Meshhedte, ımam Reza kesenesi janynda ótedi dep josparlanǵan.
Iraktaǵy qaraly sharalar AQSh pen Iran arasyndaǵy Ormýz buǵazy mańyndaǵy shıelenis qaıta kúsheıgen tusta ótip jatyr.
Buǵan deıin Álı Hameneımen qoshtasý rásimderi Tegeranda bastalǵany habarlanǵan.
