Álı Bektaev: Qordaılyqtar dárigerge tekserilý úshin Qyrǵyzstanǵa baryp júr
NUR-SULTAN. QazAqparat - QR Parlamenti Senatynyń depýtaty Álı Bektaev Jambyl oblysy Qordaı aýdany turǵyndarynyń medıtsınalyq kómek alý úshin kórshi Qyrǵyz eline baratyndyǵyna alańdaýshylyq tanytty, dep habarlaıdy QazAqparat tilshisi.
"Qordaıda da másele bar. Bul tek áleýmettik qana emes, sonymen birge saıası da másele. Bizdiń Jambyl oblysynyń, onyń ishinde Qordaı aýdanynyń turǵyndary emhanalardyń materıaldyq jaǵdaıynyń tómen bolýyna baılanysty dárigerdiń tekserýinen ótý úshin Qyrǵyzstanǵa barady. Al bul 150 myń turǵyny bar úlken aýdan sanalady", - dedi ol búgin Senattaǵy "Óńir" depýtattyq tobynyń otyrysynda.
Osyǵan oraı depýtat atalǵan aýdanda aýrýhanalar men emhanalar salý qajettigine basa nazar aýdardy.
"Qazaqstan turǵyndarynyń tekserýden ótý úshin Qyrǵyzstanǵa barýy uıat emes pe. Emhanalar men aýrýhanalar salý qajet shyǵar. Qalaı desek te mundaı strategııalyq máselege nazar aýdarýymyz kerek", - dedi Álı Bektaev.
