Álı Bektaev: Qazaqstanda barlyq áleýmettik bıýdjetti biriktiretin biregeı qor qurý qajet
Depýtattar búginge deıin Biryńǵaı jınaqtaýshy zeınetaqy qorynda jınalǵan 10 trıllıon teńgeden astam qarjyny tıimdi paıdalaný jaıynda óz oılaryn ortaǵa saldy. Qazirgi tańda 1988 jyldyń 1 qańtarynda jumys ótili 25 jylǵa tolǵan er azamattarǵa jáne 20 jylǵa tolǵan áıelderge tapqan orta tabysynyń 60 paıyzyn zeınetaqy retinde tóleý tártibi qarastyrylǵan. Munyń ózi aýyldyqtardyń kópshiligine berilmeıtin bolyp shyqty. Sebebi, aýyl sharýashylyǵy jumystarynyń negizinen maýsymdyq bolýyna baılanysty kóp eńbekkerlerdiń jumys ótili 20-25 jylǵa jetpeıdi.
Senator Qazaqstan Respýblıkasynyń 2030 jylǵa deıingi merzimge arnalǵan zeınetaqy júıesin jańǵyrtý týraly tujyrymdamasynyń jobasymen muqııat tanysyp, odan eshqandaı jańalyq kórmegenin atap ótti. Onda tek kepildendirilgen tómengi zeınetaqy degen uǵym engizilgen kórinedi. Sonda aýyldaǵy zeınetkerler sol tómengi zeınetaqymen qala beretin bolady. Senator mundaı tujyrymdamany múldem qabyldaýǵa bolmaıdy dep esepteıdi.
«Jańa qabyldanatyn tujyrymdama, aýyl zeınetkerleriniń zeınetaqysyn kóterýdiń, aýyl eńbekkerleriniń zeınetaqy jınaqtaryn kóbeıtýdiń joldaryn qarastyratyn, sol aýyldardyń zeınetaqy qarjylarynyń saqtalýyn kepildendiretin qujat bolýy kerek dep oılaımyn», – dedi Álı Bektaev.
Senator Qazaqstanda jańa áleýmettik saıasat engizý kerek dep sanaıdy. Ol saıasat negizinen balalardy qorǵaýǵa jáne qoldaýǵa baǵyttalýy kerek.
«Balalar – bizdiń bolashaǵymyz. Eger biz búgin olarǵa eń tómengi kedeılik sheginiń 70 paıyzyna teń áleýmettik járdemaqy berip kelsek, onda erteń olardan Otanǵa degen patrıotızm men súıispenshilikti talap etýge eshqandaı quqyǵymyz bolmaıdy», – dedi depýtat.
Senator Álı Bektaev memleket balalarǵa arnalǵan barlyq járdemaqylardy jınaqtap, balalardyń árqaısysyn, turmystyq jaǵdaıyna qaramaı, týǵannan 18 jasqa tolǵanǵa deıin kepildi jáne mindetti túrde áleýmettik qoldaýdyń jańa standarttaryn engizýdi usynyp otyr. Ol «bala kapıtaly» degen ataýmen arnaıy kartochkalar arqyly ár balanyń qajetine ǵana jumsalýy tıis.
«Balalardyń úıdegi jaǵdaıyn qalyptastyrý maqsatynda ómirge otbasylardy súıemeldeý ınstıtýtyn, otbasynyń saýlyq ındeksin, otbasylardyń áleýmettik kartalaryn engizý sııaqty sharalar qabyldanýy kerek dep oılaımyz. Ásirese, qazaqstandyqtardy qalalyq, aýyldyq dep bólmeı, olarǵa áleýmettik kepildikterge birdeı jaǵdaı týǵyzý maqsatynda barlyq áleýmettik bıýdjetti biriktiretin biregeı áleýmettik qor qurý qajet. Oǵan barlyq memlekettik, atqarýshy organdar men kvazımemlekettik korporatsııalar jáne holdıngterdiń, demeýshilik tanytatyn kásipkerlerdiń múmkindikterin jumyldyrýdyń mańyzy zor», – dedi Álı Bektaev.
Depýtat saýalynyń sońynda árbir qazaqstandyq ómirlik sapanyń eń joǵary standarttaryna laıyq ekenin atap ótti.
