Álı Álıev «Jeńis» fýtbol klýby bas bapkeri qyzmetinen ketti
ASTANA. KAZINFORM - «Jeńis» fýtbol klýby Álı Álıev negizgi komandanyń bas bapkeri qyzmetin aıaqtaǵanyn málimdedi.
Tájirıbeli maman bul qyzmetke 2025 jyldyń jeltoqsan aıynda kelgen edi. Qazir «Jeńis» týrnır kestesinde 23 upaımen segizinshi orynda keledi.
Álı Álıev 1980 jyly 27 qazanda Almaty qalasynda dúnıege kelgen. Fýtbolshy mansabynda «TsSKA-Qaırat», «Qaırat», «Ertis», «Tobyl», «Shyǵys», «Ordabasy» jáne «Qyzyljar» klýbtarynda oınady. Sondaı-aq Túrkııanyń «Akchaabat Sebatspor», «Kaıserı Erdjıespor», «Kartalspor» jáne «Dıarbakyrspor» komandalarynda oıyn kórsetken.
1999 jyly Qazaqstan jastar quramasy sapynda Nıgerııada ótken jastar arasyndaǵy álem chempıonatyna qatysty. Ulttyq qurama sapynda alǵashqy matchyn 2002 jyly Estonııaǵa qarsy ótkizdi.
Bapkerlik mansabyn 2014 jyly «Ordabasy» sapynda oıynshy ári bapker retinde bastady. 2018 jyly «Qyzyljar» klýbynyń tizginin ustap, Premer-lıgaǵa shyǵardy. 2021 jyly Qaraǵandynyń «Shahter» klýbynda bas bapker bolsa, odan keıin «Astana» fýtbol klýbynyń jastar komandasyn basqardy.
2022 jyly «Jeńis» komandasyn jattyqtyrdy. Qaıtadan «Qyzyljarǵa» oralyp, petropavldyq klýb ÝEFA Konferentsııa lıgasy irikteý kezeńiniń úshinshi aınalymyna deıin jetti.
2025 jyldyń qańtar aıynda Qazaqstan ulttyq quramasynyń bas bapkeri bolyp taǵaıyndalǵan edi.
Endi ol «Jeńis» FK tehnıkalyq dırektory retindegi jumysyn jalǵastyrady.
Jańa qyzmetinde Álı Álıev klýbtyń sporttyq vertıkalin damytý, kásibı komandalardyń jumysyn úılestirý, selektsııalyq qyzmet, fýtbolshylardy daıarlaý ádisnamasyn jetildirý, sondaı-aq «Jeńis» FK uzaqmerzimdi sporttyq strategııasyn júzege asyrý máselelerine basa nazar aýdarady.
Eske salsaq, budan buryn 51 jastaǵy tájirıbeli maman Igor Cherevchenko «Aqtóbe» fýtbol klýbynyń jańa bas bapkeri atandy.
