Álı Álıev resmı túrde Qazaqstan ulttyq quramasy bas bapkeri boldy

ASTANA. KAZINFORM - Álı Álıev resmı túrde Qazaqstan ulttyq quramasy bas bapkeri bolyp taǵaıyndaldy. Ol buǵan deıin bas bapker mindetin atqarýshy boldy.

Bul jóninde Qazaqstan fýtbol federatsııasynyń keńesshisi Nursultan Qurman áleýmettik jelidegi paraqshasynda málim etti.

Álı Álıev 1980 jyly 27 qazanda Almaty qalasynda dúnıege kelgen. Fýtbolshy mansabynda «TsSKA-Qaırat», «Qaırat», «Ertis», «Tobyl», «Shyǵys», «Ordabasy» jáne «Qyzyljar» klýbtarynda oınady.

Sondaı-aq Túrkııanyń «Akchaabat Sebatspor», «Kaıserı Erdjıespor», «Kartalspor» jáne «Dıarbakyrspor» komandalarynda oıyn kórsetken.

1999 jyly Qazaqstan jastar quramasy sapynda Nıgerııada ótken jastar arasyndaǵy álem chempıonatyna qatysty. Ulttyq qurama sapynda alǵashqy matchyn 2002 jyly Estonııaǵa qarsy ótkizdi.

Bapkerlik mansabyn 2014 jyly «Ordabasy» sapynda oıynshy ári bapker retinde bastady.

2018 jyly «Qyzyljar» klýbynyń tizginin ustap, Premer-lıgaǵa shyǵardy. 2021 jyly Qaraǵandynyń «Shahter» klýbynda bas bapker bolsa, odan keıin «Astana» fýtbol klýbynyń jastar komandasyn basqardy.

2022 jyly «Jeńis» komandasyn jattyqtyrdy. Qaıtadan «Qyzyljarǵa» oralyp, petropavldyq klýb ÝEFA Konferentsııa lıgasy irikteý kezeńiniń úshinshi aınalymyna deıin jetti.

2025 jyldyń qańtar aıynda Qazaqstan ulttyq quramasynyń bas bapkeri mindetin atqarýshy bolyp taǵaıyndaldy. 

Onyń jetekshiligimen ulttyq qurama 2026 jylǵy áleme chempıonatyna irikteý kezeńinde Ýelsten (1:3) jeńilip, Lıhtenshteındi (2:0) tize búktirdi.

Endi el quramasy aldaǵy oıynyn 9 maýsymda óz alańynda Soltústik Makedonııa quramasyna qarsy ótkizedi.