Álı Álıev & «Qyzyljar» fýtbol klýby arasyndaǵy daý: sot sheshimi shyqty
ASTANA. KAZINFORM — Petropavlda «Qyzyljar» fýtbol klýbynyń basshylyǵy men fýtboldan ulttyq quramanyń bas bapkeri Álı Álıev arasyndaǵy daý-damaı boıynsha sot jalǵasyp jatyr.
Resmı málimetke súıensek, Álı Álıev fýtbol klýbynan júldeli oryndar úshin bonýs, eńbekaqy bereshegi jáne ótemaqy tóleýdi talap etken. Áńgime 201 mln teńge aıasynda bolyp tur.
Petropavl qalasynyń № 2 sotynyń sheshiminde aıtylǵandaı, «Qyzyljar» fýtbol klýby Álı Álıevpen jasalǵan qosymsha kelisimderdi zańsyz dep taný týraly sotqa talap túsirgen.
— «Qyzyljar» fýtbol klýby» jaýapkershiligi shekteýli seriktestiginiń Álıev Álı Hanalıevıchke qarsy 2023 jylǵy 1 maýsymdaǵy № 34-2024 eńbek shartyna qosymsha kelisim men 2022 jylǵy 30 sáýirdegi № 68-2021 eńbek shartyna qosymsha kelisimdi zańsyz dep taný týraly talap qanaǵattandyrylsyn. Sonymen qatar atalǵan fýtbol klýby men Álı Álıevtiń arasynda jasalǵan 2023 jylǵy 1 maýsymdaǵy № 4-2024 eńbek shartyna qosymsha kelisim zańsyz dep tanylsyn, — delingen sot sheshiminde.
Sondaı-aq resmı aqparatta «Qyzyljar» fýtbol klýby men ulttyq quramanyń bas bapkeri arasynda jasalǵan 2022 jylǵy 30 sáýirdegi № 65-2021 eńbek shartyna qosymsha kelisimniń de zańsyz dep tanylǵany aıtylǵan.
— Álı Álıev «Qyzyljar» fýtbol klýby JShS-nyń paıdasyna 3 932 teńge kóleminde memlekettik baj tólemi jáne ókildiń qyzmeti úshin 1 000 000 teńge óndirip alynsyn. Bul sheshimge onyń tolyq nusqasy shyǵarylǵan kúnnen bastap 1 aı ishinde apellıatsııalyq shaǵym berýge nemese prokýror tarapynan apellıatsııalyq ótinishhat keltirýge quqyly (Azamattyq protsestik kodekstiń 403, 404-baptaryna sáıkes). Shaǵym Soltústik Qazaqstan oblystyq sotynyń azamattyq ister jónindegi sot alqasyna Petropavl qalasynyń № 2 soty arqyly beriledi. Sot talqylaýyna qatyspaǵan tulǵalar úshin atalǵan merzim olarǵa sheshimniń kóshirmesi joldanǵan kúnnen bastap esepteledi, — dep túsindirildi óńirlik sottan.
Eske salaıyq, Álı Álıev bıyl sáýirde Qazaqstan ulttyq quramasynyń bas bapkeri bolyp taǵaıyndaldy.