Álı Álıev fýtboldan Qazaqstan quramasyn jattyqtyrady
ASTANA. KAZINFORM – Qazaqstan ulttyq quramasy bas bapkeriniń mindetin ýaqytsha atqarýshy bolyp otandyq maman Álı Álıev taǵaıyndaldy.
Qazaqstan fýtbol federatsııasynyń baspasóz qyzmetinen málim etkenindeı, Álı Hanalıuly 1980 jyly 27 qazanda Almaty qalasynda dúnıege kelgen.
Fýtbolshy mansabynda «TsSKA-Qaırat», «Qaırat», «Ertis», «Tobyl», «Shyǵys», «Ordabasy» jáne «Qyzyljar» klýbtarynda oınady. Sondaı-aq Túrkııanyń «Akchaabat Sebatspor», «Kaıserı Erdjıespor», «Kartalspor» jáne «Dıarbakyrspor» komandalarynda óner kórsetken.
1999 jyly Qazaqstan jastar quramasy sapynda Nıgerııada ótken jastar arasyndaǵy álem chempıonatyna qatysty. Ulttyq qurama sapynda alǵashqy matchyn 2002 jyly Estonııaǵa qarsy ótkizdi.
Bapkerlik mansabyn 2014 jyly «Ordabasy» sapynda oıynshy ári bapker retinde bastady. 2018 jyly fýtbolshy mansabyn aıaqtaǵan soń Petropavldyń «Qyzyljar» klýbynyń tizginin ustap, Premer-lıgaǵa shyǵardy.
2021 jyly Álıev Qaraǵandynyń «Shahter» klýbynda bas bapker bolyp jumys istep, keıin «Astana» FK jastar komandasyn basqardy.
2022 jyly «Jeńis» komandasyn jattyqtyryp, sodan keıin qaıtadan «Qyzyljarǵa» oraldy. Álı Álıevtiń jetekshiligimen petropavldyq klýb ÝEFA Konferentsııa lıgasy irikteý kezeńiniń úshinshi aınalymyna deıin jetti.
Sonymen qatar Nurbol Jumasqalıev pen Eldos Ahmetov Qazaqstan quramasy bas bapkeriniń kómekshileri boldy.
Oral fýtbolynyń túlegi Nurbol Járdemuly – Premer-lıgada eń kóp match ótkizgen oıynshy jáne úzdik surmergeni. Ol 526 kezdesýde 167 gol soqqan.
2001-2014 jyldar aralyǵynda Qazaqstan ulttyq quramasynyń namysyn qorǵap, 58 matchqa qatysty.
2021-2023 jyldary Qazaqstan jastar quramasy bas bapkeriniń kómekshisi boldy.
Qazirgi ýaqytta Nurbol Jumasqalıev Qostanaıdyń «Tobyl» klýbynyń bas bapkeri qyzmetin atqarady.
Eldos Ahmetov 2012-2022 jyldar aralyǵynda Qazaqstan ulttyq quramasynda óner kórsetti. 2024 jyly jastar quramasynyń bas bapkeriniń kómekshisi qyzmetin atqaryp, al sol jyldyń qazan aıynda ulttyq quramanyń bapkerlik shtabyna qosyldy.
Eske sala keteıik, budan buryn aǵylshyndyq klýbtyń 17 jastaǵy oıynshysy gol soǵyp, rekord jasaǵanyn jazǵan edik.