Alı Alıev fýtboldan Qazaqstan quramasy bas bapkeri qyzmetinen ketetinin málimdedi

ASTANA. KAZINFORM - Fýtboldan Qazaqstan quramasynyń bas bapkeri Alı Alıev óz erkimen qyzmetinen ketetinin málim etti.

Qazaqstandyq maman mundaı sheshimge ulttyq quramanyń 2026 jylǵy álem chempıonatynyń irikteý kezeńinde Belgııadan iri eseppen (0:6) jeńilgennen keıin kelgen.

- Qysqa ǵana aıtqym keledi: jeńilisti óz moınyma alamyn, bul – meniń kinám. Fýtbolshylardyń esh qatysy joq. Elge oralǵan soń birden jumystan ketý jóninde aryz jazamyn, - dedi ol oıynnan keıingi baspasóz máslıhatynda.

Alı Alıev 1980 jyly 27 qazanda Almaty qalasynda dúnıege kelgen.

Fýtbolshy mansabynda «TsSKA-Qaırat», «Qaırat», «Ertis», «Tobyl», «Shyǵys», «Ordabasy» jáne «Qyzyljar» klýbtarynda oınady. Sondaı-aq Túrkııanyń «Akchaabat Sebatspor», «Kaıserı Erdjıespor», «Kartalspor» jáne «Dıarbakyrspor» komandalarynda óner kórsetken.

Bapkerlik mansabyn 2014 jyly «Ordabasy» sapynda oıynshy ári bapker retinde bastady. 2018 jyly fýtbolshy mansabyn aıaqtaǵan soń Petropavldyń «Qyzyljar» klýbynyń tizginin ustap, Premer-lıgaǵa shyǵardy.

2021 jyly Álıev Qaraǵandynyń «Shahter» klýbynda bas bapker bolyp jumys istep, keıin «Astana» FK jastar komandasyn basqardy.

2022 jyly «Jeńis» komandasyn jattyqtyryp, sodan keıin qaıtadan «Qyzyljarǵa» oraldy. Álı Álıevtiń jetekshiligimen petropavldyq klýb ÝEFA Konferentsııa lıgasy irikteý kezeńiniń úshinshi aınalymyna deıin jetti.

Onyń basshylyǵymen Qazaqstan ulttyq quramasy bıyl qańtar aıynan bastap 7 kezdesýde eki márte jeńip, qalǵanynda qarsylastaryne esi jiberdi.

Qazirge deıin qazaqstandyq fýtbolshylar Belgııadan ózge Ýels (1:3, 0:1) pen Soltústik Makedonııa (0:1) quramalarynan jeńilip, Lıhtenshteınnen (2:0) basym tústi.