Álı Ahmedovtiń rıngke oralatyn kúni belgili boldy

NUR-SULTAN. QazAqparat – Ekinshi orta salmaqtaǵy qazaqstandyq boksshy Álı Ahmedov (16-1, 12 KO) rıngke kóktemde oralýdy josparlap otyr, dep habarlaıdy QazAqparat Sports.kz portalyna silteme jasap.

BoxRec.com saıtynyń deregi boıynsha, Ahmedovtiń kelesi jekpe-jegi 12 naýryzda AQSh-tyń Florıda shtatynda ótedi. Naqty orny men qarsylastyń esimi ázirge belgisiz.

Qazaqstandyq boksshy óziniń eń keıingi aıqasyn 2020 jyldyń 19 jeltoqsanynda AQSh-tyń Gollıvýd qalasynda ekvadorlyq Karlos Gongoraǵa (19-0, 14 KO) qarsy ótkizgen bolatyn. IBO álem chempıony ataǵy úshin bolǵan kezdesýde ol kútpegen jerden nokaýtqa túsip, jeńilip qaldy.

Eske sala ketsek, Ahmedov Gennadıı Golovkınniń (41-1-1, 36 KO) GGG Promotions promoýterlik kompanııasynyń klıenti jáne otandyq chempıonmen birge Djonaton Benkstyń qolastynda jattyǵady.