Álı Ahmedovtiń kelesi qarsylasy anyqtaldy

NUR-SULTAN. QazAqparat – Ekinshi orta salmaqtaǵy qazaqstandyq boksshy Álı Ahmedov (17-1, 13KO) kelesi jekpe-jegin 10 jeltoqsanda AQSh-ta ótkizedi, dep habarlaıdy QazAqparat VKontakte jelisindegi «Qazaqstannyń kásipqoı boksy» paraqshasyna silteme jasap.

BoxRec.com málimetinshe, jekpe-jek Montebello qalasynda (Kalıfornııa shtaty, AQSh) ótedi. Ahmedovtyń qarsylasy meksıkalyq Paýl Valensýela (26-10, 17KO) bolady. Ekinshi orta salmaqtaǵy aıqas on raýndqa josparlanǵan. Aıqas Qazaqstan ýaqytymen 11 jeltoqsan kúni tańerteń ótedi.

Qazaqstandyqtyń buǵan deıingi jekpe-jegi de sol qalada bıylǵy 16 qyrkúıekte ótken bolatyn. Ol perýlik boksshy Davıd Segarrýdi (34-6, 21KO) úshinshi raýndta merziminen buryn jeńdi.

Valensýelaǵa toqtalar bolsaq, ol 13 qarashada Anahaımda amerıkalyq Dımıtrıýs Ballardadan (21-0-1, 13KO) tóreshilerdiń biraýyz sheshimimen jeńilip qaldy.

Aıta keteıik, 2017 jyly Paýl rıngte otandasymen kezdesip, birinshi orta salmaqtaǵy bolashaq álem chempıony Haıme Mýngııadan (38-0, 30KO) ekinshi raýndta tehnıkalyq nokaýtpen jeńilgen bolatyn.