Álı Ahmedov Golovkınniń aıqasy anderkardynda rıngke shyǵady
NUR-SULTAN. QazAqparat - Qazaqstandyq kásipqoı boksshy Álı Ahmedov osy jyldyń maýsym aıynda kelesi kezdesýin ótkizgeli otyr, dep habarlaıdy QazAqparat tilshisi Qazaqstan kásipqoı boks federatsııasynyń VKontakte paraqshasyna silteme jasap.
«Álı Ahmedov (14-0, 10KO) Bıg Beardaǵy (AQSh, Kalıfornııa shtaty) Abel Sanchestiń zalynda jattyǵýyn jalǵastyryp jatyr. Jattyǵý kezindegi vıdeosyn boksshynyń ózi Instagram paraqshasyna júktedi. Kútilip otyrǵanyndaı, Ahmedov 8 maýsymǵa josparlanǵan Gennadıı Golovkınniń (38-1-1, 34KO) kelesi aıqasynyń anderkardynda óner kórsetedi. Ahmedov qazirgi ýaqytta Gennadııdiń GGG Promotions kompanııasynda ekenin eske salamyz», - delingen habarlamada.
Aıta ketsek, 24 naýryzda ótken óziniń sońǵy aıqasynda Ahmedov tóreshilerdiń biraýyzdan bergen sheshimimen AQSh boksshysy Maık Gaıdan (9-4-1, 5KO) basym túsken bolatyn.
Eske sala keteıik, orta salmaqta birqatar uıymnyń tujyrymy boıynsha burynǵy álem chempıony Gennadıı Golovkın maýsym aıynda kelesi kezdesýin ótkizetini osyǵan deıin habarlanǵan bolatyn. Dúnıejúzilik boks keńesiniń (WBC) resmı saıty taratqan aqparatqa sáıkes, GGG 8 maýsym kúni Nıý-Iorktegi «Medıson Skver Garden» arenasynda jekpe-jek ótkizedi. Al qarsylasynyń esimi keıinirek belgili bolady. Sheteldik BAQ derekterine qaraǵanda, Golovkın ne frantsýz boksshysy Hassan Ndam Njıkammen, ne bolmasa kanadalyq Stıv Rollspen aıqasady.
