Alǵysty tek merekede ǵana aıtpaýymyz kerek - Pak Lı
ASTANA. QazAqparat - Alǵysty tek merekede ǵana aıtpaýymyz kerek. Semeıdegi káris ultynyń ókili, saıasattaný ǵylymynyń doktory Pak Lı «Dıdar» gazetine bergen suhbatynda osylaı málimdedi.
Onyń aıtýynsha qanshama halyqty baýyryna basqan qazaq halqyna alǵys aıtylýy kerek eken. «Bizdiń ultymyzdyń qıyn-qystaý zamanda eń alǵash qonys aýdarǵan jeri - Úshtóbe qalasy. Sol qalada biz 1999 jyly qazaq halqyna alǵys retinde qara tastan jasalǵan pıramıda túrinde eskertkish ornattyq. Óıtkeni bizdiń káris ata-babalarymyzdyń basyna túsken kún eshqashan umytylmaýy tıis. Árıne, alǵysty tek merekede ǵana aıtpaýymyz kerek», - dep sanaıdy Pak Lı.
«Totalıtarlyq júıe mıllıondaǵan azamattardyń taǵdyryn tálkekke saldy. Sol jyldary ulttyq múddeni qorǵaǵan zııalylardy, qarapaıym eńbek adamdaryn jazyqsyz qýdalasa, keıinnen bul saıasat shekaralyq aımaqtaǵy tutastaı halyqtardy týǵan jerinen aıyryp, basqa aımaqqa kúshpen jer aýdartty. Olardy qonystandyrǵan jerdiń qatarynda Qazaqstan da bar bolatyn», dep jazady basylym.
